काठमाडौं । काठमाडौं उपत्यकामा मेलम्चीको खानेपानी वितरण सुरु भएको छ । मेलम्ची खानेपानी विकास समितिले मंगलबारदेखि काठमाडौं उपत्यकामा मेलम्ची खानेपानी आयोजनाको पानी वितरण सुरु गरेको हो । 

न्युज एजेन्सी नेपालसँग मेलम्ची खानेपानी विकास समितिका कार्यकारी निर्देशक ई.रत्नप्रसाद लामिछानेले हाल काठमाडौं उपत्यकामा मेलम्ची खोलबाट दैनिक २२ करोड लिटर पानी ल्याइएको जानकारी दिए । 

अघिल्लो वर्षभन्दा यो वर्ष मेलम्चीको पानी छिटो काठमाडाैंमा आएको छ । पानी पठाउने संरचनामा निरन्तर अनुगमन गरेर क्षतिबाट बचाएकाले समयमै पानी काठमाडाैंमा पठाउन सकिएको प्रमुख लामिछानेले जानकारी दिए । उनले उपत्यकामा हिजोबाट दैनिक १७ करोड लिटर पानी प्रशोधन गरेर वितरण भइरहेको बताए । 

उनले पाँच करोड लिटर पानी भने वाग्मती नदीमा पठाइएको बताए । “मेलम्ची खोलामा अहिले प्रशस्त पानी छ । करिव ४० करोडदेखि ५० करोड लिटर पानी खोलामा छ । तर हामीले सबै पानी डाइभर्ट गरेका छैनौँ । अहिले हामीले २५ करोड लिटर पानी डाइभर्ट गरेका छौँ,” उनले भने, “काठमाडौंमा करिब २२ करोड लिटर पानी आइपुगेको छ । तर हाम्रो पानी प्रशोधन केन्द्रको क्षमता भनेको १७ करोड लिटर मात्रै छ । बढीमा हामी १८ करोड लिटर पानी प्रशोधन गर्नसक्छौँ । बाँकी रहेको पानी वाग्मती नदीमा छोडिरहेको छौँ ।”

उनले वाग्मतीमा दिनको करिब पाँच करोड लिटर पानी मेलम्ची नदीबाट थपिएको बताए । वाग्मतीमा अहिले करिब नौ करोड लिटर पानी थप भएको छ । 

कार्यकारी निर्देशक लामिछानेले मेलम्चीबाट आएको पानी पिउनयोग्य भएको बताए । उनले मेलम्चीबाट सुन्दरीजल ल्याइएको पानी चार तहसम्म प्रशोधन गरेर वितरण गरिने बताए ।  यद्यपि, पुरानो लाइनबाट गएको पानी भने पाइपहरूको टुटफुटका कारण प्रदूषित हुनसक्ने उनको भनाइ छ । मेलम्ची आयोजनाको नयाँ लाइनबाट आएको पानी भने नउमालिकन पिउन सकिने गुणस्तरमा रहेको उनको दाबी छ ।