काठमाडौं । सेक्युर्ड सेक्युरिटिजले आजबाट आफ्नै ट्रेड मेनेजमेन्ट सिस्टम (टीएमएस) सञ्चालनमा ल्याएको छ । आफ्नै टीएमएस सञ्चालन गर्न स्वीकृति पाएका नासा सेक्युरिटिज र साउथ एसियन बुल्सले पनि केही समयमा सञ्चालनमा ल्याउने बताइएको छ ।

सेक्युर्ड, नासा र साउन एसियन बुल्सलाई नेपाल स्टक एक्सचेन्ज (नेप्से)ले आफ्नै टीएमएस सञ्चालन गर्न अनुमति दिएको थियो ।

३३ वटा ब्रोकरले नेप्सेसँग आफ्नै टीएमएस सञ्चालनमा ल्याउन लबिङ गर्दै आएका छन् ।  

अनलाइनमार्फत सेयर कारोबार गर्न सुरू भएदेखि नै ब्रोकरहरूले आफ्नै टीएमएस सञ्चालनमा ल्याउने र ग्राहकलाई आफूले भने जस्ता फिचरको सुविधा दिन भन्दै आएका थिए ।

सेक्युर्ड सेक्युरिटिजसहित नासा र साउथ एसियन बुल्सले भने चालु आर्थिक वर्ष २०८१/०८२ देखि आफ्नै टीएमएसमार्फत सेवा दिन पूर्वाधार तयार पारेर नेप्सेबाट अनुमति पाएका हुन् । नेप्सेले पनि प्रारम्भिक अध्ययन गरेर अवस्था हेरी आफ्नै टिएमएसमार्फत सेवा दिन स्वीकृति दिएको नेप्सेका प्रवक्ता मुराहरि पराजुलीले बताए ।