काठमाडौं । नेपाल बार एसोसिएसनका अध्यक्ष गोपालकृष्ण घिमिरेविरुद्धको अदालतको अवहेलना मुद्दा फिर्ता हुने भएको छ । बार अध्यक्षको अभिव्यक्तिले अदालतको अवहेलना भएको प्रतिवेदन तयार पारेर सर्वोच्चमा दर्ता गरेका उपरजिष्ट्रार गोविन्दप्रसाद घिमिरेले प्रतिवेदन फिर्ता लिने भएका हुन् । 

उनले आफू जीवनभर प्रजातन्त्रका लागि लडेको आफ्ना पिताले पनि यसकै लडाइमा जीवन गुजारेको भन्दै प्रतिवेदन दर्तापछि निदाउँन नसकेको उल्लेख गरेका छन् । उनले नेपाल बार एशोसिएशन प्रजातन्त्रको हिमायति संस्था भएको पनि उल्लेख गरेका छन् । 

“म हिजोदेखि निदाउँन सकेको छैन । जीवनभर प्रजातन्त्रको पछि लागियो । बा सँधै यसकै लडाईं लड्नु भयो,” घिमिरेले लेखेका छन्, “बार जनताको आवाज हो । लोकतन्त्रको हिमायती हो । त्यसको नेतृत्वविरुद्ध मैले अवहेलनामा दिएको प्रतिवेदन फिर्ता लिएको जानकारी गराउँछु ।” 

उनले अदालत खुला भएपछि औपचारिक निवेदन दिने भन्दै आफू कसैको प्यादा भएर काम नगर्ने पनि उल्लेख गरेका छन् । 

“अदालत खुला हुँदा आफ्ना भनाइसहित औपचारिक निवेदन दिनेछु,” घिमिरेले भनेका छन्, “म कसैको प्यादा बन्न चाहिनँ ।”