काठमाडौं । नेपाल निर्माण व्यवसायी महासंघले आफूहरूले पाउनुपर्ने बक्यौता भुक्तानी नभए आन्दोलनमा जान बाध्य हुने चेतावनी दिएको छ । बिहीबार काठमाडौंमा पत्रकार सम्मेलन गर्दै महासंघले भुक्तानीको समस्या समाधान नगरिए तत्काल सशक्त आदोलनमा उत्रन बाध्य हुने चेतावनी दिएको हो ।

विगत लामो समयदेखि राज्यले विभिन्न आयोजनाहरूका निर्माण व्यवसायीलाई भुक्तानी गर्नुपर्ने दायित्व करिब ४५ अर्ब रुपैयाँ रहेको महासंघका अध्यक्ष रवि सिंहले जानकारी दिए ।

ठूलो रकम भुक्तानी गर्न बाँकी रहेको अवस्थामा हाल बिनाबजेटका टेन्डर आह्वान गरिएबाट निर्माण उद्योगमा अझ प्रतिकूल अवस्था उत्पन्न भएको उनले बताए । अध्यक्ष सिंहले दुई आर्थिक वर्षयता पूर्ण भुक्तानी हुन नसकेको सुनाए ।

समयमा नै भुक्तानी नगरिँदा व्यवसायीले बैंक ऋण किस्ता र राज्यलाई बुझाउनुपर्ने कर रकम समेत बुझाउन नसकिएको र त्यसले धेरै कानुनी जटिलता उत्पन्न भएको महासंघले जनाएको छ । हिमालयन टेली भ्वाइस