काठमाडौं । नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ले नेपालमा शक्तिराष्ट्रहरूको चलखेल बढेको बताएका छन् । शनिबार काठमाडौंमा आयोजित एक कार्यक्रममा उनले यस्तो बताएका हुन् ।

हाल नयाँ शीतयुद्ध चलिरहेको र त्यसको केन्द्रविन्दु नेपाल बन्न सक्ने खतरा विज्ञले औँल्याएको उनले उल्लेख गरे । उनले हाल असामान्य ढंगको परिस्थिति सिर्जना भइरहेको टिप्पणी गरे । अन्तर्राष्ट्रिय र राष्ट्रिय परिस्थिति सामान्य नरहेको उनले बताए ।

उनले हाल संसार तेस्रो विश्वयुद्धको संघारमा रहेको टिप्पणी गरे । राष्ट्रिय परिस्थितिमा पनि केही असाधारण कुरा भइरहेको उनको भनाइ थियो ।

अध्यक्ष प्रचण्डले अन्तर्राष्ट्रिय तनावको प्रभाव दक्षिण एसियामा पनि परेको उल्लेख गरे ।

कार्यक्रममा अध्यक्ष प्रचण्डको भनाइ पढ्नोस्–
यति बेलाको परिस्थिति, समग्र विश्व परिस्थिति पनि अहिले असाधारण, असामान्य ढंगले बढेको छ । चाहे रुस, युक्रेन युद्ध, ढाई वर्षदेखि चलिरहेको छ । त्यसको विश्वव्यापी असर छ । इजरायल र हमासबीच चलिरहेको लडाइँ वा इरान र इजरायलको बीचमा कति बेला विस्फोट हुन्छ थाहा छैन । अहिले संसार तस्रो विश्वयुद्धको संघारमा छ । ढोकामै आइपुगेको छ भन्न पनि सुरु गरिएको छ । विश्व पहिलाको भन्दा पनि असुरक्षित भएको छ । अन्तर्राष्ट्रिय तनावको प्रभाव दक्षिण एसियामा पनि परेको छ, श्रीलंका, बंगलादेशको घटनालाई हेर्दा थाहा हुन्छ । नेपाललाई राम्रोसँग उपयोग गर्न जान्यो भने नेपालको निम्ति ठूलो अवसर छ । हामीले जानेनौँ र सकेनौँ भने निकै ठूलो दुर्घटनामा पनि जान सक्छ । नयाँ शीतयुद्ध चलिरहेको र यसको केन्द्रविन्दु नेपाल पो हुने हो कि भन्ने कतिपयले भनेका छन् । अहिले शक्तिराष्ट्रहरूको ध्यान र चलखेल नेपालमा अलि बढी नै छ । अन्तर्राष्ट्रिय परिस्थिति त्यस्तो छ । राष्ट्रिय परिस्थिति पनि सामान्य छैन । राष्ट्रिय परिस्थितिमा पनि केही असाधारण कुराहरू केही समययता भएका छन् । संसदीय प्रणालीमा पहिलो र दोस्रो ठूलो दलको सरकार प्रायः बनाउँदैनन् । न्युज एजेन्सी नेपाल