काठमाडौं । राष्ट्रिय स्वतन्त्र पार्टी (रास्वपा)की सांसद सोविता गौतमले सहकारी ठगीको आरोपबाट सभापति रवि लामिछानेले मुक्ति पाएको बताएकी छन् । चरित्र हत्या गरेर लामिछानेलाई राजनीतिबाट गलाउने र थकाउने प्रयास असफल भएको गौतमको भनाइ छ ।

सोमबार राति फेसबुकमा गौतमले भनेकी छन्, "अन्ततः माननीय रवी लामिछानेले सहकारी ठगीको झुटो आरोपबाट मुक्ति पाउनुभएको छ । उहाँलाई चरित्रहत्या गरेर राजनीतिबाट गलाउने र थकाउने असफल प्रयासहरू गरिए । तर, फरक दलका राजनीतिक नेतृत्वहरू मिलेर बनेको संसदीय छानबिन समितिले उहाँले सहकारीको पैसा ठगी नगरेको प्रमाणित गर्दा उहाँको निर्दोषिता सिद्ध भएको छ ।"

उनले आफूहरू इमान्दार र समर्पित नेतृत्वको समर्थनमा एकताबद्ध रहेको पनि बताएकी छन् ।

सहकारी ठगी छानबिन संसदीय विशेष समितिका सदस्य लेखनाथ दाहालका अनुसार, रास्वपाका सभापति लामिछाने सहकारीबाट गोर्खा मिडियामा आएको ६५ करोड खर्च गर्ने क्रममा संलग्न देखिएका छन् । तर, सहकारीबाट गोर्खा मिडियामा पैसा ल्याउने क्रममा उनको 'संलग्नता देखिएको छैन ।'