पोखरा । पोखरा उद्योग वाणिज्य संघ (पोउवासंघ)को नयाँ नेतृत्वका लागि शनिबार भएको निर्वाचनको सदस्यतर्फको मत परिणाम आएको छ ।

नेतृत्वमा अर्जुन पोखरेल र गोकर्ण कार्की प्रतिष्पर्धामा छन् । पोखरेल प्यानल नै लिएर चुनावमा होमिएका थिए । कार्कीले अध्यक्षमा मात्र उमेदवारी दिएका हुन् ।

मतदानमा सदस्यतर्फ दुई हजार ६५ मत खसेको थियो । १० जना सदस्य निर्वाचित हुने भए पनि १४ जना उमेदवार मैदानमा थिए ।

आइतबार सदस्यतर्फको मतगणना सकिँदा पोखरेल प्यानलका आठजना सदस्य निर्वाचित भएका छन् । पोखरेल प्यानलबाट सदस्यमा लेखनाथ सुवेदी, भीम गौतम, जीवनप्रकाश श्रेष्ठ, प्रेमप्रसाद सुवेदी, सौगात थापा, देवेन्द्र प्रजु सदस्यका उमेदवारी दिएका थिए । त्यस्तै, टीकाराम सुवेदी (माधव), ललितबहादुर कुँवर, दुधमान (आशिष) गुरुङ र यादव पोखरेल पोखरेल समूहबाट सदस्यमा उमेदवारी दिएका थिए ।

यीमध्ये पोखरेल समूहबाट जीवनप्रकाश श्रेष्ठ, ललितबहादुर कुँवर, सौगात थापा, टीकाराम सुवेदी, देवेन्द्र प्रजु, दुधमान गुरुङ, भीम गौतम र यादव पोखरेल विजयी बनेका छन् ।

स्वतन्त्र उमेदवारी दिएकामध्ये प्रदीपराज भण्डारी र रामचन्द्र तिमिल्सिना विजयी बने । सदस्यतर्फ कुवँरले सर्वाधिक एकहजार ५८६ मत ल्याए ।

यस प्यानलबाट वरिष्ठ उपाध्यक्षमा उत्तममान बुद्धाचार्य, उद्योग उपाध्यक्षमा दिनेशचन्द्र बास्तोला, वाणिज्य उपाध्यक्षमा बलराम आचार्य, महासचिवमा शोभा गौतम र कोषाध्यक्षमा मनोजकुमार श्रेष्ठ निर्वाचित भइसकेका छन् ।

अब अध्यक्षमा दुईजना र उपमहासचिवमा दुई जनाको प्रतिष्पर्धा रहेको छ । अध्यक्षमा पोखरेल र कार्कीबीच प्रतिष्पर्धा हुँदा उपमहासचिवमा बालकृष्ण कोइराला र सुदीपमान प्रधानांगबीच प्रतिष्पर्धा हुँदै छ । कोइरालाले पोखरेल प्यानलबाट उमेदवारी दिएका हुन् ।

अब पदाधिकारीको मतगणना हुने निर्वाचन समितिले जनाएको छ ।

कुल दुईहजार ९०७ मतदातामध्ये दुईहजार २५१ मत खसेको थियो ।