तेहरान । लामो समयदेखि पश्चिमा आलोचना खेप्दै आएको एयरोस्पेस कार्यक्रमका निम्ति इरानले शनिबार नयाँ अनुसन्धान उपग्रह प्रक्षेपण गरेको इरानी सञ्चारमाध्यमले जनाएका छन् ।

“चाम्रन–१ अनुसन्धान उपग्रहलाई गाएम–१०० रकेटले सफलतापूर्वक प्रक्षेपण गरी कक्षमा स्थापित गरेको छ,” राष्ट्रिय टेलिभिजनले भनेको छ ।

करिब ६० किलोग्राम (१३२ पाउन्ड) तौल भएको उक्त स्याटेलाइटलाई कक्षीय प्रविधिका निम्ति हार्डवेयर र सफ्टवेयर प्रणालीको परीक्षण गर्न डिजाइन गरिएको जनाइएको छ ।

रक्षा मन्त्रालयसँग सम्बद्ध इरानी विद्युतीय उद्योगले यो उपकरणको डिजाइन बनाएर निर्माण गरेको सरकारी टेलिभिजनले जनाएको छ ।

संयुक्त राज्य अमेरिकालगायत पश्चिमा सरकारहरूले इरानलाई यस्ता प्रक्षेपणविरुद्ध बारम्बार चेतावनी दिँदै आएका छन् । र, यही प्रविधि ब्यालिस्टिक क्षेप्यास्त्रका निम्ति प्रयोग गर्न सकिने बताउँदै आएका छन् ।

इरानले आणविक अस्त्रको खोजी नगरेको र आफ्नो स्याटेलाइट र रकेट प्रक्षेपण नागरिक वा प्रतिरक्षा प्रयोजनका निम्ति मात्र भएको जनाउँदै आएको छ ।

इरानको रिभोल्युसनरी गार्ड कोप्र्सको अन्तरिक्ष हेर्ने संगठनले गाएम–१०० रकेटको निर्माण गरेको हो । यो क्यारियर देशको पहिलो र तीन तहको ठोस–इन्धन उपग्रह प्रक्षेपक हो ।

इरानी सरकारी सञ्चारमाध्यमले जनवरीमा ५०० किलोमिटरभन्दा माथिको कक्षमा पहिलोपटक उपग्रह पठाउनका निम्ति यसको प्रयोग गरिएको जनाएका छन् । 

इरानले वर्षौँदेखि आफ्नो अन्तरिक्ष गतिविधिलाई शान्तिपूर्ण र संयुक्त राष्ट्रसंघको सुरक्षा परिषद्को प्रस्तावानुसार रहेको जनाउँदै आएको छ ।

गएको फेब्रुअरीमा रुसले इरानी रिमोट सेन्सिङ र इमेजिङ स्याटेलाइटलाई अन्तरिक्षमा पठाएको थियो । त्यति बेला इरानका सञ्चारमन्त्रीले विगत दुई वर्षमा इरानले एक दर्जन स्याटेलाइट प्रक्षेपण गरिसकेको बताएका थिए ।

गार्ड्सले एउटा अनुसन्धान उपग्रह प्रक्षेपण गरेको करिब एक हप्तापछि जनवरीमा इरानले एकैपटक तीन उपग्रहलाई कक्षमा पठाएको जनाएको थियो ।

इस्लामिक गणतन्त्र इरानले विगतमा धेरै उपग्रह प्रक्षेपण विफलताको सामना गर्नुपरेको छ ।

सन् २०१८ मा तत्कालीन राष्ट्रपति डोनाल्ड ट्रम्पको नेतृत्वमा रहेको संयुक्त राज्य अमेरिकाले तेहरान र प्रमुख शक्तिराष्ट्रहरूबीच भएको ऐतिहासिक आणविक सम्झौतालाई एकतर्फी रूपमा त्यागेपछि इरानले पश्चिमा प्रतिबन्धको सामना गर्दै आएको छ । रासस/एएफपी