काठमाडौं । सम्पर्कविहीन भएको साढे एक महिना नाघिसक्दा पनि ममता काफ्लेको अवस्था अझै अज्ञात छ । अन्तिमपटक गएको जुलाई २७ मा देखा परेकी ममता त्यसयता सम्पर्कविहीन छिन् । उनको हत्या भइसकेको आशंका गरिए पनि ठोस प्रमाणको अभावमा अहिलेसम्म पुष्टि हुन सकेको छैन ।

अनुसन्धान अधिकारीहरूले उनलाई खोज्ने प्रयास गरिरहेका छन् । पछिल्लोपटक प्रहरीले बिहीबार (भदौ २७ गते) मात्र उनीहरूको घरमा खोजतलास गरेको छ । प्रहरीले  घटनाबारे नयाँ प्रमाण फेला परेकाले थप खोजतलास गरेको जनाए पनि विस्तृतमा बताएको छैन । मंगलबारमात्र प्रहरीले ममताको बेपत्तासँग जोडिएको हुन सक्ने महत्त्वपूर्ण जानकारी प्राप्त भएको बताएको थियो ।

यसअघि, गत हप्ता प्रहरीले जुलाई २८ देखि अगस्ट ५ सम्म ममताका श्रीमान् नरेश भट्टको सम्पर्कमा आएका व्यक्तिहरूसँग सोधपुछ गरेको थियो ।

उनका श्रीमान् ३७ वर्षीय भट्ट अगस्ट २२ यता हिरासतमा छन् । श्रीमती ममताको हत्या गरेर शव लुकाएको आरोप नरेशलाई लागेको छ । यद्यपि, उनले निरन्तर आरोप अस्वीकार गर्दै आएका छन् । पर्याप्त प्रमाण नपुगेकै कारण उनीमाथि हत्याको मुद्दा चलाइएको छैन ।

अनुसन्धान अधिकारीहरूले नै ममता जीवित हुने सम्भावना निकै कम रहेको बताइसकेका छन् । प्रहरीले शव लुकाइएको हुन सक्ने आशंकामा धेरैपटक सम्भावित ठाउँमा खोजतलास गरिसकेको छ । प्रहरीले ब्लुम्स क्रसिङ कम्युनिटी, मनासस क्रिस्चियन स्कुल, क्याम्प क्यारोन्डेलेट र ब्लुम्स पार्कसहित उनीहरूको घरमा धेरैपटक खानतलासी गरेको छ ।

के हो घटना ?

ममता अन्तिमपटक गएको जुलाई २७ मा देखिएको थिइन् । त्यो दिन उनी आफ्नो काम गर्ने ठाउँमा थिइन् । उनी मनाससकै यूभीए हेल्थ प्रिन्स विलियम मेडिकल सेन्टरको मेडिकल सर्जिकल युनिटमा रजिस्टर्ड नर्सका रूपमा काम गर्थिन् ।

उनले जुलाई २८ मा एकजना साथीसँग कुरा गरेको पाइएको छ । त्यही दिन उनले आफ्नो टिकटकबाट आफू र आफ्नो छोरी देखिने गरी भिडियो पोस्ट गरेको देखिन्छ । 

उनी सम्पर्कमा नआएपछि उनकै सहकर्मीहरूले अगस्ट १ मा उनको अवस्थाबारे बुझिदिन प्रहरीलाई आग्रह गर्छन् । त्यसपछि अगस्ट २ मा प्रहरी उनको घर पुग्छ । ममता हप्ताको दुई दिन काम गर्थिन् । अगस्ट १ र २ मा उनी काममा जानुपर्ने थियो । तर, उनले काममा आउने/नआउनेबारे कुनै जानकारी नदिएपछि उनका सहकर्मीहरूले प्रहरीलाई उनको अवस्थाबारे बुझिदिन आग्रह गरेका थिए ।

प्रहरी ममताको घर पुग्छ । तर, उनी भेटिँदैनन् । प्रहरीले उनका श्रीमान् नरेशसँग सोधपुछ गर्छ ।उनले ममता आफ्नो सम्पर्कमा नभएको बताउँछन् । नरेशले सुरुमा हराएको रिपोर्ट नगर्ने बताउँछन् ।

प्रहरीले सोधपुछ गरेको तीन दिनपछि अगस्ट ५ मा नरेशले श्रीमती हराएको रिपोर्ट गर्छन् । त्यसक्रममा उनले प्रहरीलाई आफूले ममतालाई अन्तिमपटक ३१ जुलाईमा डिनरमा देखेको बताउँछन् ।

अनुसन्धान अधिकारीहरूले अगस्ट ५ देखि ८ सम्म गहिरो छानबिन गर्छन् । त्यस क्रममा उनीहरूले केही दिन यता ममता र उनका परिवार र साथीहरूसँग र सहकर्मीहरूसँग कुनै सम्पर्क नभएको थाहा पाउँछन् । सामाजिक सञ्जालमा पनि ममता सक्रिय भएको पाइँदैन ।

नरेशले सुरुमा अनुसन्धान अधिकारीहरूलाई सघाउँछन् । प्रहरीहरूले सोधेको प्रश्नहरूको जवाफ दिन्छन् । स्थानीय सञ्चारमाध्यमसँगको कुराकानीका क्रममा उनले 'हराएकी' श्रीमतीलाई सन्देश पनि दिन्छन् । 

त्यस क्रममा उनले भनेका हुन्छन्, "तिमी कहाँ छौ, घर फर्क । घरमा म र बच्चा मात्रै छौँ । प्रत्येक सेकेन्ड हामी तिमीलाई पर्खिरहेका छौँ । प्रत्येक पल तिम्रो प्रतिक्षा गरिरहेका छौँ । यदि तिमी सुन्दै छौ भने हामी तिम्रो लागि पर्खिरहेका छौँ । हामीलाई तिम्रो आवश्यकता छ ।"

नरेशले स्थानीय सञ्चार माध्यमसँग ममता तीन वर्षदेखि आफ्ना लागि विशेष मान्छे भएको बताउँछन् । उनले ममता यसअघि तीनपटक हराएको पनि बताउँछन् । तर, यसरी लामो समयसम्म कहिल्यै नहराएको उनको भनाइ थियो ।

अगस्ट २१ मा अनुसन्धान अधिकारीहरूले घरमा खोजतलास गर्छन् । तर, खोजतलासको कारण खुलाइएको हुँदैन । खोजतलासका लागि प्रहरीले पटकपटक सर्च वारेन्ट लग्छ । घटनालाई लिएर सयौँ अन्तर्वार्ता गर्छ ।

विस्तारै नरेशले अनुसन्धान अधिकारीहरूलाई सघाउन छाड्छन् । घटना शंकास्पद लागेपछि प्रहरीले २१ अगस्टमा नरेशलाई पक्राउ गर्छ । उनीहरूको एकवर्षीय बालकलाई पनि प्रहरीले आफ्नै साथमा लग्छ ।

फरकफरक अभिव्यक्ति, शंकास्पद गतिविधि

स्थानीय सञ्चारमाध्यमका अनुसार श्रीमती बेपत्ताबारे नरेशले फरकफरक अभिव्यक्ति दिँदै आएका छन् । ममताले बेपत्ता हुनुअघि आफ्नो फोन फुटाएको दाबी नरेशको छ ।

जुलाई ३० मा नरेशले एउटा मार्टबाट तीनवटा चक्कु किनेको पाइएको अनुसन्धान अधिकारीहरूले बताएका छन् । त्यसको अर्को दिन जुलाई ३१ मा नरेश अर्को मार्टमा देखापरेका छन् । जहाँ उनले सरसफाइ गर्ने सामग्री किनेको पाइएको छ । 

अनुसन्धान अधिकारीहरूले उनीहरूको मुख्य बेडरुममा रगत भेटाएका थिए । कार्पेटमा पनि शंकास्पद प्रमाण भेटिएको अनुसन्धान अधिकारीहरूको भनाइ छ । खाट पनि सारिएको पाइएको छ । उनीहरूको बाथरुममा रगत भेटिएको छ । अनुसन्धान अधिकारीहरूले केही वस्तुलाई घिसार्दै बाथरुमसम्म पुर्‍याइएको अनुमान गरेका छन् ।

बाथ टबलाई खोल्दा पनि रगतको संकेत भेटिएको बताइएको छ । तर, अहिलेसम्म उनीहरूको घरमा भेटिएको रगत कसको हो भन्ने पुष्टि भइसकेको छैन ।

अनुसन्धान अधिकारीहरूले सरसफाइका लागि किनिएको सामग्री पनि भेटाएका छन् । घर पनि लथालिंग अवस्थामा रहेको बताइएको छ ।

नरेशले १९ अगस्टमा आफ्नो टेस्ला कार बेचेका थिए । त्यसपछि घरमा कतै जानका लागि तयार पारिएको जस्तोदेखि नै सुटकेस पनि फेला पारेको बताइएको छ ।

घरेलु हिंसा र ममता

ममताले गत फेब्रुअरीमा चिनजानको दिदी पर्ने सुनिता थापा बस्नेतलाई आफूमाथि श्रीमान्‌बाट घरेलु हिंसा भइरहेको बताएकी थिइन् । 

"मैले उसलाई घर छोड्न पनि भनेकी थिएँ । बरु तिमी मेरो घरमा आउन सक्छौ भनेकी थिएँ । नभए कतै सेल्टरमा बस्न भनेकी थिएँ । मैले सक्ने सबै सहयोग अफर गरेकी थिएँ । तर, उनी मानिनन् ।"

त्यसको केही समयपछि ममताले बबितालाई मेसेज गरिन् । "दिदी म उसलाई (नरेश) एक मौका दिन चाहन्छु । म उसलाई एकदमै धेरै माया गर्छु, उसलाई अप्ठेरोमा पार्न चाहन्न, राम्रो मान्छे र राम्रो बुवा बनोस् भन्ने चाहन्छु," मेसेजमा ममताले भनेकी थिइन् । 

बबिता ममतालाई एक इमान्दार, मेहनती, स्वतन्त्र, व्यक्तिग रूपमा चिन्छिन् । उनका अनुसार, मतालाई खाना पकाउन मन पर्थ्यो । संगीत मन पर्थ्यो । र, आफ्नो छोरीलाई संसारमा सबैभन्दा धेरै माया गर्थिन् ।

छिमेकीहरू पनि नरेशमाथि लागेको आरोपदेखि अचम्मित छैनन् । यदि ममता कतै गएको भए उनले बच्चालाई एक्लै नछाड्ने तर्क छिमेकीहरूको छ ।

एजेन्सीहरूको सहयोगमा ।