काठमाडौं । चलचित्र ‘एक्टरः टेक वान’ले नायिका आना शर्माको क्यारेक्टर पोस्टर सार्वजनिक गरेको छ । कात्तिक १५ गते (लक्ष्मीपूजा)बाट प्रदर्शनमा आउन लागेको चलचित्रको निर्माणपक्षले आनाको क्यारेक्टर पोस्टर सार्वजनिक गरेको हो । 

पोस्टरमा आना वान पिसमा सहरीया युवतीका रुपमा चित्रित छिन् । उनको चरित्रको नाम प्रकृति रहेको निर्माणपक्षले जानकारी दिएको छ । 

यसअघि यो सिनेमाका तीनवटा पोस्टर सार्वजनिक भइसकेका छन् । राजन भुसालको निर्देशन रहेको ‘एक्टर’मा प्रदीप खड्का, राजवल्लभ कोइराला र आनासँगै नव–नायिका दिव्या रायमाझी, अभिनेता दिव्य देव, सुशील सिटौलालगायतको अभिनय छ । अभिनेता दिलीप रायमाझीकी छोरी दिव्याले यही सिनेमाबाट डेब्यु गरेकी हुन् ।

अदृत फिल्मस् र मोती फिल्मस्को प्रस्तुतिमा रहेको सिनेमाका निर्माता थमन कुमार भण्डारी हुन् । अनिश भुसाल चलचित्रका सह–निर्माता हुन् । क्रिएटिभ प्रोडुसर मोती कार्की रहेको सिनेमाको लाइन प्रोड्युसरमा तोरन क्षेत्री हुन् । 

सिनेमाको कथा आकाश बराल र राजन स्वयंले लेखेका छन् । सिनेमालाई नरेन्द्र मैनालीले खिचेका छन् ।