काठमाडौं । कतारका लागि नेपाली राजदूतमा सिफारिस रमेशचन्द्र पौडेललाई सांसदहरूले राजदूत पद आराम गर्नका लागि नबनाइएको भन्दै सतर्क गराएका छन् । मंगलबार संसदीय सुनुवाइका क्रममा सांसदहरूले उनलाई राजदूत भएर गएपछि आराम नगर्न सुझाव दिए ।

“राजदूत आराम गर्न जाने पदजस्तो भएको छ । यो प्रश्नको जवाफ दिने गरी काम गर्नुहोला,” समितिका सदस्य महेशकुमार बर्तौलाले भने ।

पौडेल विराटनगरका पूर्वमेयर हुन् । उनी २०५४ देखि ५९ सम्म विराटनगरका मेयर थिए ।

“राजदूत भनेको सेवा सुविधा लिएर नेपालीको उपेक्षा गर्ने, नेपालीलाई बेवास्ता गर्ने र आराम गर्न जाने हो कि भन्ने परेको छ । यता ध्यान दिनुहोला,” कांग्रेसका सांसद ज्ञानेन्द्रबहादुर कार्कीले भने ।

सांसदहरूले उठाएको प्रश्नको जवाफ दिने क्रममा पौडेलले आफू आराम गर्न राजदूतमा सिफारिस नभएको बताए । 

“मैले कतारका लागि पूर्वराजदूतसँग कुरा गरेको थिएँ । उहाँ ‘त्यहाँ गएपछि सुत्न नपाएर डाइबेटिजको बिरामी भएर औषधि खानुपर्‍यो’ भन्दै हुनुहुन्थ्यो । त्यो ठाउँ आराम गर्न पाउने ठाउँ होइन,” पौडेलले भने । 

सुनुवाइका क्रममा पौडेलले आफ्ना कार्ययोजना समितिमा प्रस्तुत गरेका थिए । उनले आफू कतारमा रहेका नेपाली श्रमिकहरूको हित संरक्षण र प्रवर्धनमा लाग्ने प्रतिबद्धता जनाए ।

“राजदूत नियुक्त भएमा कतारमा रहेका रोजगारदातका कार्यस्थलको अनुगमन गर्ने र सम्बन्धित अधिकारीहरूसँग वार्ता गरी समस्या समाधान गर्ने छु,” उनले आफ्नो योजना सुनाए ।

कार्यक्षेत्र एवं सार्वजनिक क्षेत्रमा हुने दुर्घटना, मृत्यु, डिप्रेसन, दुर्व्यसन आदि कम गर्न शिक्षा, सचेतना र परामर्श सेवाका लागि सहजीकरण गर्ने उनले बताए । उनले कतारबाट वैदेशिक लगानी नेपालमा भित्राउन पनि पहल गर्ने जनाए ।

“कतारका उद्यमी, व्यवसायीहरू वैदेशिक लगानी गर्न उत्सुक देखिन्छन् । त्यसका लागि हाम्रो देशको नीति, ऐन, कानून र व्यवसाय सहजताका बारेमा विस्तृत छलफल, सूचना–जानकारी प्रदान गर्न ध्यान केन्द्रित हुने छ,” पौडेलले भने ।

पोखरा र भैरहवाबाट नियमित हवाई सेवा सञ्चालन गर्न पनि कतारलाई अनुरोध गर्ने उनले बताए ।