काठमाडौं । इटालियन स्प्रिन्टर भ्यालेन्टिना पेट्रिलो पेरिस पारालम्पिकमा प्रतिस्पर्धा गर्ने पहिलो तेस्रोलिंगी बन्ने भएकी छन् । ५० वर्षीय स्प्रिन्टर भ्यालेन्टिनाले दृष्टिदोष भएका खेलाडीका लागि महिला टी–१२ वर्गीकरणमा प्रतिस्पर्धा गर्नेछिन् । 

उनले सोमबार २०० मिटर र त्यसपछि ४०० मिटर प्रतिस्पर्धामा भाग लिनेछिन् । पेट्रिलोले बीबीसी स्पोर्टसँग कुरा गर्दै ओलम्पिकमा आफ्नो सहभागिता ‘समावेशीकरणको महत्त्वपूर्ण प्रतीक’ हुने बताएकी छन् । तर, पेट्रिलोको महिला दौडमा सहभागिताको विरोध गर्ने खेलाडीहरूको प्रतिनिधित्व गर्ने वकिल र एथलीट मारियुसिया क्विलेरीले भने पारालम्पिकमा निष्पक्षताभन्दा समावेशीकरणलाई छनोट गरिएको प्रतिकृया दिइन् । 

उनले यस विषयमा आफूहरूले केही गर्न नसक्ने समेत बताइन् । गत वर्ष पेट्रिलोले वर्ल्ड पारा एथलिट च्याम्पियनसिपमा दुई वटा कांस्य पदक जितेकी थिइन् । फ्रान्सको पेरिसमा जारी पारालम्पिक अगस्ट २८ देखि सुरु भएको थियो । यो प्रतियोगिता सेप्टेम्बर ८ सम्म सञ्चालन हुने तालिका छ ।