काठमाडौं । पर्यटनमन्त्री बद्री पाण्डेले नेकपा (एमाले)सँगको सहकार्यलाई खुकुरीको धारको यात्राको संज्ञा दिएका छन् । नेपाली कांग्रेसका सहमहामन्त्रीसमेत रहेका पाण्डेले केन्द्रीय समितिको बैठकमा ०८४ को निर्वाचनमा एमाले नै प्रतिष्पर्धी पार्टी भएको बताए ।

“हामीले  जोखिम उठाएका छौँ, एमाले नै ०८४ को मूल प्रतिष्पर्धी हो । हामी नै एक ठाउँमा आएका छौँ । हामी खुकुरीको धारमा यात्रा गरिरहेका छौँ,” उनले भने । 

उनले एमालेसँग तल्लो तहमै प्रतिष्पर्धा रहेकाले त्यसले समस्या निम्त्याउन सक्ने समेत बताए । “एमालेसँग वडावडा, टोलटोलमा प्रतिष्पर्धा छ । विद्यार्थीमा प्रतिष्पर्धा छ । मिलेर जाने र समाधान गर्नका लागि केन्द्रदेखि तलसम्मको संयन्त्र निर्माण गर्नुपर्छ,” उनले भने ।

उनले मन्त्रालयभित्र सम्भावना र चुनौती रहेको पनि बताए । उनले मन्त्रालय बुझेपछि मन्त्रीहरू थकित भएको टिप्पणी गरेको एक नेताले जानकारी दिए ।

“मन्त्रालय बुझेपछि सबै निराश हुनुभएको छ, थाक्नुभएको छ । यदि साँच्चै नै हामीले राजनीतिलाई जिम्मेवारीपूर्वक सोच्ने हो भने हामीलाई सजिलो छैन,” उनले भने । 

उनले कर्मचारीहरूको जागिर खानेभन्दा माथि उठ्न नसक्ने मानसिकतामा देखिएको पनि बताएका छन् ।