काठमाडौं । नेपाली कांग्रेसका महामन्त्री तथा सांसद गगनकुमार थापाले सहकारी ठगी प्रकरणमा राष्ट्रिय स्वतन्त्र पार्टी (रास्वपा)ले हतारिएर प्रश्न गर्न थालेको भन्दै त्यसको छानबिनमा विश्वास राख्न आग्रह गरेका छन् । 

बिहीबार प्रतिनिधिसभा बैठकमा दलीय आधारमा समय लिएर बोलेका सांसद थापाले सहकारी ठगी प्रकरणमा रास्वपा सभापति रवि लामिछानेको संलग्नताको प्रमाण समितिले नै सार्वजनिक गर्ने बताए । 

प्रमाणसहित प्रश्न उठाएकाहरूसँगका प्रमाण समितिमा पुगेको भन्दै समितिले गर्दै गरेको काममा विश्वास राख्न उनको आग्रह थियो । “केही दिनदेखि संसद्‌मा केही साथीहरूले प्रमाण खोइ ? प्रमाण खोइ ? भनेर खोजिराख्नु भएको पाएँ । त्यत्रो तथ्य, प्रमाणहरू भएरै त होला यत्रो संसद्‌मा संघर्ष गरेर संसदीय समिति बनाएका छौँ,” थापाले भने, “त्यो संसदीय समिति हामीले लडेर बनाएको हो नि । त्यसको टीओआर हामीले लेख्न लगाएको हो । नाम लेख्न लगाएको हो । कम्पनीको नाम लेख्न लगाएको हो । अनि त्यो तथ्य, प्रमाणहरू दिएनौँ होला हामीले ? हामीसँग भएको तथ्य, प्रमाणहरू पुगेन होला समितिमा ?” 

उनले नौ मिनेटमा चट् भनेका सभापतिलाई बयानमा नौ घण्टा किन लाग्यो भनेर प्रश्न सोध्न आग्रह गरे । “नौ मिनेटमा चट् भनेको ठाउँमा ९ घण्टासम्म अस्ति बयान दिनुपर्ने अवस्था त्यही तथ्य प्रमाण भएकोले आएको होइन होला ?,” थापाले भने, “मलाई त समितिमाथि पूरा विश्वास छ । सूर्य थापाले एकदम मेहनत गर्नुभएको छ । समितिमा भएका सबै साथीहरूमाथि विश्वास छ ।” 

उनले सभापतिले बयान दिएकोमा फैसला भएकै अर्थमा बुझेको भन्दै त्यसरी नझुक्न रास्वपा सांसदलाई आग्रह गरे । “बरु साथीहरू झुक्किनु भयो कि भन्ने लागेको छ मलाई । बयान हो बयान, सफाइ होइन । फैसला त आउनै बाँकी छ,” थापाले भने, “त्यसैले म त फैसला कुरेर बसिरहेको छु । तथ्य, प्रमाणको आधारमा फैसला आउँछ भनेर बसिरहेको छु ।” 

उनले समितिका सबैमाथि आफूले विश्वास गरेको भन्दै रास्वपालाई मात्र अप्ठेरो पर्ने उनले बताए । “रास्वपाका साथीलाई अलि अप्ठेरा पर्ला कि ? किनकी कालोलाई सेतो कसरी भन्नु ? त्यसैले दिन गनौँ । राम्रोसँग गनौँ । औँला भाँचेर गनौँ । लेखेर गनौँ । खरिले, मसिले जेले गने पनि हुन्छ,” थापाले भने, “फैसला आउने दिन गनौँ । फैसला आएपछि सँगै बसौँला ।”