काठमाडौं । सोलुखुम्बुको खुम्बु पासाङल्हामु गाउँपालिका ५ थामेमा हिमताल विष्फोट हुनुको मुख्य कारण अचानक आएको भू–परिवर्तन भएको पाइएको छ । 

सेटलाइट तस्बिर तथा घट्नाअगाडि र पछिको भू–बनोटमा आएको परिवर्तनको अध्ययनबाट उल्लेख्य भू–हलचल नै हिमताल विष्फोटको मुख्य कारण भएको पाइएको जल तथा मौसम विज्ञान विभागले स्पष्ट पारेको छ । 

हिमताल १ को प्राकृतिक बाँधभन्दा तल र हिमताल २ भन्दा माथिल्लो क्षेत्रमा अचानक आएको भू–परिवर्तन नै हिमताल २ विष्फोटनको मुख्य कारण रहेको विभागको निष्कर्ष छ । 

थामे आसपास स्याङवोचे र फोर्सेमा घट्नाको केही दिन अगाडिको वर्षा र तापक्रमको वृद्धिले माथिल्लो हिमताल २ भन्दा माथिल्लो क्षेत्रमा ग्लेसियर/आईसमेल्ट (हिमपहिरो)ले माथिल्लो हिमताल १ ओभरफ्लो भएको हुनसक्ने विभागको भनाइ छ । 

हिमताल १ ओभरफ्लो हुँदा हिमताल १ र हिमताल २ (हाल विष्फोट भएको हिमताल)को बीचको जमिनमा भू–क्षय भएर तल्लो हिमताल विष्फोटन भएको पाइएको विभागले स्पष्ट पारेको छ । 

साउन ३२ गते दिउँसो साढे १ बजे सोलुखुम्बुको खुम्बु पासाङल्हामु गाउँपालिका ५ थामे भइ बग्ने थामे खोलामा एक्कासी बाढी आएको थियो ।