काठमाडौं । उपप्रधान तथा अर्थमन्त्री विष्णु पौडेलले अर्थतन्त्रमा अझै सुधार नभएको बताएका छन् । शुक्रबार नेपाल उद्योग तथा व्यवसायी महासंघले आयोजना गरेको ‘समृद्ध अर्थतन्त्र निर्माणको आधार : सवल निजी क्षेत्र र बलियो पूर्वाधार’ विषयक कार्यक्रममा मन्त्री पौडेलले दैनिक उठ्ने राजस्वले साधारण खर्च धान्न नसक्ने अवस्था रहेको बताए ।

“अर्थतन्त्रका सूचकहरू सकारात्मक बनाउने हामीसामु चुनौती छ । राजस्वले हाम्रो साधारण खर्च धान्न नसक्ने अवस्थाबाट हामी बाहिर निस्किसकेका छैनौँ,” उनले भने, “पुँजीगत खर्च गर्ने क्षमतालाई हामीले गुणात्मकरूपमा वृद्धि नगरिकन विकास र समृद्धिका कुरा गरेर केही काम छैन ।”

राज्यले भुक्तानी गर्नुपर्ने तर बजेटमा नसमेटिएका दायित्वहरू धेरै रहेको पनि उनले बताए ।

गत आर्थिक वर्षको साउनको तुलनामा राजस्व वृद्धि २० प्रतिशतले बढेको छ । तर, बजेटले राखेको लक्ष्य भेटाउन राजस्व संकलन वृद्धि मासिक ३० प्रतिशत हुनुपर्ने उनको भनाइ छ ।

मौद्रिक नीतिले अर्थतन्त्र चलायमान बनाउन सहयोग गरेको पनि उनले बताए ।