काठमाडौं । प्रथम राष्ट्रपति डा. रामवरण यादवले देशमा शिक्षाको अवस्था विकराल रहेको बताएका छन् । बिहीबार काठमाडौंमा आयोजित एक कार्यक्रममा उनले यस्तो बताएका हुन् ।

उनले देशका अधिकांश सामुदायिक विद्यालयमा मुख्य विषयका शिक्षक नपाइने समस्या विद्यमान रहेको भन्दै सरकारको ध्यानाकर्षण गराए । एसईईमा ५२ प्रतिशत विद्यार्थी अनुत्तीर्ण हुनु यसकै नतिजा रहेको उनले उल्लेख गरे ।

नेपाली समाजलाई कहाँ लगिँदै छ भन्ने शिक्षाको स्तर हेरेर नै थाहा हुने उनले टिप्पणी गरे । उनले शिक्षा विधेयक हाल संसद्मा रहेको भन्दै यसमा आवश्यक विचारविमर्श गर्न आग्रह गरे ।

उनले सरकारको नेतृत्व तहबाट काम हुन नसक्दा संविधानमाथि दोष दिइएको बताए । सबै राजनीतिक दलले सत्ताका निम्ति मरिहत्ते गरिरहेका उनको भनाइ थियो ।

प्रथम राष्ट्रपति यादवले सबै मिलेर कोलाहल मच्चाउने काम भइरहेको बताए । देशमा ८० प्रतिशत खाद्यान्न बाहिरबाट ल्याइने गरेको भन्दै उनले यसरी मुलुकमा समाजवाद नआउने टिप्पणी गरे ।

कार्यक्रममा डा. यादवको भनाइ पढ्नोस्–
अहिले शिक्षा विधेयक हाउसमा छ । राम्रोसँग सोच्नुस्, राम्रोसँग विचार गर्नुस् । कम्तीमा सामुदायिक विद्यालयहरूमा ८० प्रतिशत विद्यालयमा शिक्षक छैनन् । ५२ प्रतिशत विद्यार्थी एसईईमा फेल भए भनिरहेका छन् । मुख्य–मुख्य शिक्षकहरू नै छैनन् । राहत वा सामुदायिकस्तरमै राखेर जेनतेन अध्ययन गराइएको छ । यसले नेपाली समाजलाई कहाँ लगिएको छ भन्ने देखाउँछ । संविधानको दोष छैन । संविधान – गणतन्त्र, लोकतन्त्र, समावेशी छ, संघीयतासहित छ । सारा कुरा छ । तर, त्यो लागु कसरी गर्ने देखिरहेको छ । पार्टीलाई सत्तामा नगईकन नहुने । यहीँ भारतमा अहिले राहुलले पक्रिएको छ लाइन, अर्कोपटक आउँछ, हेर्नुहोला । बेलायतमा त्यस्तै छ । कांग्रेसलाई के परेको हो ! न्युज एजेन्सी नेपाल