काठमाडौं । राष्ट्रियसभाका सांसदहरूले सहकारी ठगीमा संलग्नहरूलाई तत्काल कारबाही हुने गरी कानूनी व्यवस्था गर्न सरकारसँग माग गरेका छन् । बुधबार सिंहदरबारमा बसेको राष्ट्रियसभाअन्तर्गतको विकास, आर्थिक मामिला तथा सुशासन समितिको बैठकमा सांसदहरूले सदाचारको पक्षमा नउभिने कुनै पनि संस्थामाथि कडा कारबाही हुने गरी तत्काल कानूनी व्यवस्था गर्न सरकारलाई दबाब दिएका हुन् ।

प्रमुख प्रतिपक्ष दल नेकपा (माओवादी केन्द्र)का सांसद झक्कुप्रसाद सुवेदीले सहकारी ठगहरूको सम्पत्ति जफत गरेर पीडितलाई क्षतिपूर्ति दिने व्यवस्था गर्न सरकारलाई सचेत गराए । उनले गरिवको पैसामा मोज गर्ने ठगहरूलाई तत्काल कडा कानून बनाएर कारबाही गर्ने काममा ढिलाइ नगर्न पनि सरकारको ध्यानाकर्षण गराए ।

नेकपा (एकीकृत समाजवादी)का सांसद घनश्याम रिजालले सदाचार नीतिलाई लागु गर्दै मुलुकमा विद्यमान भ्रष्टाचारलगायत अनैतिक कामहरूको अन्त्य गर्ने काममा सरकार र संसद् दुवैले जोड दिनुपर्ने आवश्यकता औँल्याए । उनले नयाँ पुस्तालाई सदाचारको नीतिअनुसार अघि बढाउन नसकेको मुलुकको विकास र समृद्धि सम्भव नहुनेसमेत स्पष्ट पारे ।

पूर्वउपप्रधानमन्त्रीसमेत रहेकी सांसद वामदेव गौतमले सरकारले सदाचार नीति लागु नगर्ने कुनै पनि निकायमाथि कडा कारबाही हुने व्यवस्था गर्नुपर्ने बताए । उनले विद्यालयमा सदाचार नीति नभए अनुदान नदिने व्यवस्था गर्न पनि सरकारलाई दबाब दिए ।

सांसद गौतमले सहकारी संस्थाहरूले ऋण प्रवाह गर्न नपाउने व्यवस्था पनि सरकारले गर्नुपर्ने आवश्यकता औँल्याए ।