नैरोबी । एकै हप्तामा एक हजार २०० जनामा एमपक्स (मंकीपक्स) पुष्टि भएसँगै सन् २०२४ जनवरीयता अफ्रिकामा कुल १८ हजार ७३७ जनामा उक्त भाइरसको संक्रमण फेला परेको अफ्रिकी युनियन स्वास्थ्य एजेन्सीले शनिबार जनाएको छ ।

स्वास्थ्य विभागको तथ्यांकानुसार, भाइरसको तीन भेरियन्ट छन्, तीमध्ये एउटा अत्यधिक घातक, अधिक संक्रामक ‘क्लेड–१ बी’ हो । पछिल्लो समय बढिरहेको एमपक्स संक्रमणलाई विश्व स्वास्थ्य संगठन (डब्ल्यूएचओ)ले  बुधबार अन्तर्राष्ट्रिय स्वास्थ्य आपत्काल घोषणा गरेको थियो ।

हालसम्म १२ अफ्रिकी सदस्य राष्ट्रबाट तीन हजार १०१ घटना पुष्टि हुनुका साथै संक्रमणका कारण ५४१ जनाको मृत्यु भएको रोग नियन्त्रण र रोकथामका निम्ति अफ्रिका केन्द्र (सीडीसी)ले विज्ञप्तिमार्फत जनाएको छ ।

संक्रमणबाट सबैभन्दा बढी प्रभावित देश कंगोमा सन् २०२३ सेप्टेम्बरमा पहिलोपटक भाइरसको नयाँ ‘क्लेड–१ बी’ भेरियन्ट पत्ता लागेको थियो । त्यहाँ एक हप्तामा एक हजार पाँचजनामा संक्रमण पुष्टि भएकामा २४ जनाको मृत्यु भएको थियो ।

लगभग १० करोड मानिस बसोबास गर्ने कंगोका सबै प्रान्तमा संक्रमणका घटना दर्ता गरिएको छ ।

यस्तै, छिमेकी बुरुन्डीमा एमपक्सको १७३ ‘केस रिपोर्ट’ गरिएको छ ।

अफ्रिकाभन्दा बाहिर स्वीडेन र पाकिस्तानमा पनि यो हप्ता एमपक्स संक्रमण फेला परेको छ । यसै सन्दर्भमा डब्ल्यूएचओको आपत्कालीन समितिले सम्बन्धित निकायसँग खोप उत्पादन बढाउन आह्वान गरेको छ ।

एमपक्स एउटा भाइरल रोग हो । व्यक्तिहरूबीचको नजिकको सम्पर्कबाट एमपक्स फैलन सक्छ । शारीरिक सम्पर्क, स्पर्श, एकार्काको नजिक सास फेर्दा यो रोग सर्ने सम्भावना हुन्छ ।

यसका लक्षणमा ज्वरो, मांसपेशी दुख्ने र छालामा ठूला फोकाजस्ता घाउहरू आउने हुन्छ । रासस/एएफपी