काठमाडों ।  यही साउन २३ गते भएको एयर डाइनेस्टी हेलिकोप्टर दुर्घटनामा ज्यान गुमाएका चिनियाँ नागरिकको शव परिवारले अहिलेसम्म बुझेका छैनन् । दुर्घटनामा ज्यान गुमाएका चारजना चिनियाँ नागरिकको शव त्रिवि शिक्षण अस्पतालको 'मर्चरी कोल्ड रुम'मा राखिएको छ ।

अस्पतालका फरेन्सिक मेडिसिन विभागका प्रमुख डा. गोपालकुमार चौधरीका अनुसार दाँतको रिपोर्ट (डेन्डल म्याचिङ) मार्फत उनीहरूको पहिचान गरिएको थियो । साउन २७ गते नै शव पहिचान भए पनि परिवारले लैजाने/नलानेबारे अहिलेसम्म निर्णय दिएका छैनन् ।

“हामीले पहिचानको काम सकेर शव सुरक्षित राखिदिएका छौँ । शव लैजाने वा यतै अन्त्येष्टि गर्ने भन्नेबारे परिवारबाट अहिलेसम्म केही खबर आएको छैन,” डा. चौधरीले बाह्रखरीसित भने ।

पाइलट अरूण मल्लको शव भने परिवाले बुझेर अन्त्येष्टि गरिसकेका छन् ।

काठमाडौंबाट रसुवाका निम्ति उडेको एयर डाइनेस्टीको ९ एन–एजेडी हेलिकोप्टर नुवाकोटको शिवपुरी गाउँपालिका–७ स्थित सूर्यचौरमा दुर्घटना हुँदा पाइलट मल्लसहित चारजना चिनियाँ नागरिकको मृत्यु भएको थियो ।

हेलिकोप्टर दुर्घटनाको छानबिन गर्न सरकारले सुवास थापा संयाेजक रहेको जाँचबुझ समिति गठन गरेको छ ।