काठमाडौं । डच टिम आयाक्स एम्सटरड्याम र पानाथिनाइकोसबीचको खेलले नतिजाको निर्णयका निम्ति कीर्तिमानी ३४ पेनाल्टी प्रहार गरेका छन् ।

बिहीबार युरोपा लिग तेस्रो छनोट चरणअन्तर्गत यी दुई टिमबीच भएको खेलको नतिजाका निम्ति ३४ पेनाल्टी प्रहार भएका हुन् । २५ मिनेटसम्म चलेको पेनाल्टी सुटआउटमा दुवै टिमका समान १७ खेलाडीले प्रहार गरेका थिए । जसमा आयाक्याले १३–१२ ले बाजी मारेको हो ।

यसअघि यूईएफएअन्तर्गतको कुनै पनि प्रतियोगितामा सबैभन्दा धेरै पेनाल्टी प्रहार गर्ने कीर्तिमान इंग्ल्यान्ड यू २१ र नेदरल्यान्ड्सबीचको खेलले राखेको थियो । सन् २००७ मा भएको यूईएफए युरोपियन यू–२१ च्याम्पियनसिपमा इंग्ल्यान्ड र डच युवा टिमले नतिजाको लागि कुल ३२ पटक पेनाल्टी प्रहार गरेका थिए ।

विश्व फुटबलमा भने सबैभन्दा लामो पेनाल्टी सुटआउटको कीर्तिमान इजरायली तेस्रो श्रेणीको लिगले बनाएको थियो । डिमोना र सिम्सोनबीच भएको उक्त खेलमा नतिजाको निर्णयका लागि कुल ५६ पेनाल्टी प्रहार भएका थिए ।

बिहीबार आयाक्सलाई जित दिलाउन गोलकिपर रेम्को पास्भिर नायक बने । उनले पाँच पेनाल्टी बचाउँदै आफ्नो प्रहारलाई गोलमा पनि परिणत गरेका थिए ।