काठमाडौं । अख्तियार दुरुपयोग अनुसन्धान आयोगले भ्रष्टाचारका मुद्दामा पूर्वाग्रह नराखिएको बताएको छ । बिहीबार प्रतिनिधिसभाअन्तर्गतको राज्य व्यवस्था तथा सुशासन समितिको बैठकमा अख्तियारका प्रमुख आयुक्त प्रेम राईले आफूहरूले कुनै पनि मुद्दामा संवेदनशील भएर अनुसन्धान गरेको दाबी गरे ।

समितिको बैठकमा भ्रष्टाचार निवारण ऐन, २०५९ लाई संशोधन गर्न बनेको विधेयकमाथि छलफल भइरहेको छ ।

"संवेदनशील भएर अनुसन्धान गरिएकाे छ । पूर्वाग्रह राखिएकाे हाे कि भन्ने आयाे, त्याे हाेइन । जुन पार्टीको मान्छे कार्यकारीमा छ, त्यही पार्टीको बढी आउँदाे रहेछ । आफ्नो नपराेस्, अरूकाे पराेस् भन्ने साेच देखिन्छ, त्याे बदल्न जरुरी छ," उनले भने ।

भ्रष्टाचार मुद्दा दायर गर्ने हदम्यादका सम्बन्धमा प्रमुख आयुक्त राईले संसद्‌को अधिकार क्षेत्र भएकाले आफूहरूको कुनै आपत्ति नरहने बताए । "हदम्यादकाे सम्बन्धमा राख्नैपर्छ भन्ने छैन । छलफल गर्नुस्, सदनबाट जे निर्णय हुन्छ । हाम्राे आपत्ति हुँदैन," उनले भने ।

तर, भ्रष्टाचारको मुद्दा दायर भएपछि निलम्बन नहुँदा प्रमाण नष्ट हुन सक्ने भएकाले यसलाई कायम राख्नुपर्ने उनको भनाए छ ।

"निलम्बन नभएपछि विशेष अदालतबाट सफाइ नपाउँदासम्म प्रमाण नष्ट हाेला, निलम्बन रही रहनुपर्छ," उनले भने ।