काठमाडौं । संस्कृति, पर्यटन तथा नागरिक उड्डयनमन्त्री बन्द्रीप्रसाद पाण्डेले हवाई दुर्घटना न्यूनीकरणबारे नेपाल नागरिक उड्डयन प्राधिकरणका पूर्वमहानिर्देशकहरूसँग छलफल गरेका छन् ।

छलफलका क्रममा पूर्वमहानिर्देशकहरूले कतिपय विमान कम्पनीले नागरिक उड्डयनका क्षेत्रमा अन्तर्राष्ट्रियस्तरमा मान्यता दिइएको तथा अन्तर्राष्ट्रिय नागरिक उड्डयन संस्था (आईकाओ)ले तोकेको सेफ्टी मेनेजमेन्ट सिस्टम (एसएमएस) लागु नगरेको बताएका थिए । उनीहरूले विमान चालक तथा प्राविधिक जनशक्ति लागि आवश्यक सुरक्षासम्बन्धी तालिम आदिमा न्यून लगानी गरेको विषयमा पनि मन्त्री पाण्डेको ध्यानाकर्षण गराएका थिए ।

त्यस्तै, नेपाल नागरिक उड्डयन प्राधिकरणको पूरै संरचना र सञ्चालनबारे ‘थर्ड पार्टी अडिट’ गराउन आवश्यक भएको र त्यसका लागि अन्तर्राष्ट्रियस्तरका ख्यातिप्राप्त संस्थाबाट विज्ञ ल्याउन सकिने सुझाव दिइएको थियो ।

दुर्घटनाको जाँच स्वतन्त्र नहुने, जाँच समितिले दिएको प्रतिवेदन कार्यान्वयन नहुने र त्यसको फलोअप नभएको हुँदा त्यसतर्फ मन्त्रालयले ध्यान दिनुपर्ने सुझावहरू दिइएको थियो ।

नागरिक उड्डयन प्राधिकरण (क्यान)को समग्र पक्षमा सुक्ष्म निगरानी गरी सुधार गर्नुपर्ने र त्यसका लागि विचाराधीन विधेयकहरू संसद्‌बाट पास गराउने पहल गर्नु पर्ने कुरामा पनि जोड दिइएको थियो ।

मन्त्री पाण्डेले पूर्व डीजीहरूलाई मन्त्रालयमै बोलाएर नेपालको हवाई क्षेत्रका समस्या र सवालबारे छलफल गरेका हुन् । मन्त्री पाण्डेले नीतिगत, कानुनी, र संरचनागत सुधारका लागि पूर्वडीजीहरूबाट सुझाव मागेका थिए ।