काठमाडौं । रवि लामिछाने नेतृत्वको राष्ट्रिय स्वतन्त्र पार्टी (रास्वपा)को राष्ट्रिय महाधिवेशन आउँदो वैशाख तेस्रो साता गर्ने प्रस्ताव गरिएको छ । शनिबार सम्पन्न पार्टीको बन्द कार्यशालाबाट पार्टीको महाधिवेशन गर्ने गरी मिति समेत तय गर्न केन्द्रीय समितिलाई उक्त सुझाव दिइएको हो ।

पार्टीको राष्ट्रिय भेला आउँदो असोज ३ र ४ गते आयोजना गर्ने निर्णय पनि बैठकबाट गरिएको छ । विधान संशोधन सुझाव कार्य दलको प्रतिवेदन भदौ मसान्तभित्र तयार गरी केन्द्रीय समितिमार्फत राष्ट्रिय भेलामा पेस गर्ने निर्णय समेत गरिएको पार्टीका कार्यवाहक महामन्त्री कविन्द्र बुर्लाकोटीले जानकारी दिए ।

“कार्यशालाले उल्लेखित पक्षहरूमा देहायका कदम चाल्नुपर्ने सुझावहरू केन्द्रीय समितिलाई दिएको छ– राष्ट्रिय भेला मिति २०८१ असोज ३ र ४ गते आयोजना गर्ने, राष्ट्रिय महाधिवेशन मिति २०८२ वैशाख तेस्रो सातामा गर्ने, विधान संशोधन सुझाव कार्यदलको प्रतिवेदन भदौ मसान्तभित्र तयार गरी केन्द्रीय समितिमार्फत राष्ट्रिय भेलामा पेस गर्ने,” उनले भने ।

रास्वपाले आउँदो साता सातै प्रदेशमा बन्द कार्यशाला आयोजना गर्ने र केन्द्रीय तहका नेताहरूलाई सहजीकरणका निम्ति खटाउने निर्णय पनि गरिएको छ । न्युज एजेन्सी नेपाल