लखनऊ । भारतको लखनऊमा बिहीबार भारी वर्षाको समयमा मोटरसाइकल चलाइरहेका एक युवक र उनको पछाडि बसेकी महिलामाथि दुर्व्यवहार गर्ने १६ युवकलाई प्रहरीले पक्राउ गरेको छ । उनीहरूलाई पानी छ्यापेर त्यहाँ रहेका युवाले मोटरसाइकल लडाइदिएका थिए ।

उक्त भिडियो सामाजिक सञ्जालमा ‘भाइरल’ भएपछि उत्तर प्रदेश सरकार र त्यहाँको कानुनी व्यवस्थाका विषयमा प्रश्न उठाइएको थियो । त्यसपछि सरकारले बाध्य भएर कारबाही थालेको हो ।

चर्को दबाबपछि मुख्यमन्त्री योगी आदित्यनाथले स्थानीय डीसीपी, एडीसीपी र एसीपीको हेरफेर गरेका छन् । स्थानीय प्रहरी चौकीका इन्चार्ज र सिपाहीलाई निलम्बन गरिएको छ ।

प्रहरीले पवन यादव, सुनील कुमारलगायत व्यक्तिलाई सीसीटिभी फुटेजका आधारमा पक्राउ गरेको थियो । अरू व्यक्तिको पनि खोजतलास भइरहेको जनाइएको छ ।

उक्त मामिलामा दुवै पीडित भने सामुन्ने नआएको बताइएको छ । उनीहरू त्यहाँबाट हिँडेपछि आफूहरूलाई चिनाउन नचाहेको पाइएको छ ।

त्यो घटना स्थानीय ताज होटेलछेउमा भएको थियो । घण्टौँदेखि पानी परेकाले त्यहाँ युवा मोजमस्ती गर्दै बसिरहेका थिए । सोही समयमा मोटरसाइकलमा पुरुष र महिला त्यहाँ पुगेका थिए । त्यसक्रममा केही युवाले पानी फ्याँक्नुका साथै मोटरसाइकल लडाइदिएका थिए ।

स्थानीय नेता र सांसदहरूले पनि उक्त भिडियो हेरेर सरकारको आलोचना गरेपछि मुख्यमन्त्री आदित्यनाथले कडा कदम चालेका हुन् । बीबीसी हिन्दीबाट ।