काठमाडौं । अविरल वर्षाको कारण गत जेठ २८ गतेदेखि देशका विभिन्न स्थानमा आएको बाढीपहिरोलगायतका विपद्‌का घटनामा परी आजसम्म १४८ जनाको मृत्यु भएको छ । 

प्रहरी प्रवक्ता एवं प्रहरी नायब महानिरीक्षक दानबहादुर कार्कीका अनुसार बाढीपहिरोलगायतका विपद्‌मा परी काठमाडौं उपत्यकामा तीन जना, कोसी प्रदेशमा २५ जना, मधेस प्रदेशमा छ जना, वाग्मती प्रदेशमा २९ जना, गण्डकी प्रदेशमा ४२ जना, लुम्बिनी प्रदेशमा २५ जना, कर्णाली प्रदेशमा आठ जना र सुदूरपश्चिम प्रदेशमा १० जना गरी जम्मा १४८ जनाको मृत्यु भएको हो । 

उनका अनुसार काठमाडौं उपत्यकामा १० जना, कोसी प्रदेशमा ३७ जना, मधेस प्रदेशमा १० जना, वाग्मती प्रदेशमा १० जना, गण्डकी प्रदेशमा ३४ जना, लुम्बिनी प्रदेशमा १० जना, कर्णाली प्रदेशमा ५१ जना र सुदूरपश्चिम प्रदेशमा १४ जना गरी जम्मा १७६ जना घाइते भएका छन् ।

बाढीपहिराका कारण काठमाडौं उपत्यकामा २६ जना, कोसी प्रदेशमा ४९ जना, वाग्मती प्रदेशमा १२ जना, गण्डकी प्रदेशमा १४ जना, कर्णाली प्रदेशमा दुई जना र सुदूरपश्चिम प्रदेशमा पाँच जना गरी जम्मा १०८ जनाको उद्धार गरिएको छ ।

साथै, कोसी प्रदेशमा दुई जना, वाग्मती प्रदेशमा ४२ जना, गण्डकी प्रदेशमा दुई जना र कर्णाली प्रदेशमा एक जना गरी ४७ जना वेपत्ता भएका र बेपत्ताको खोजी जारी रहेको प्रवक्ता कार्कीले जानकारी दिए । 

बाढीको कारण जम्मा ३८३ घर डुबानमा परेका छन् । जसअन्तर्गत २५५ वटा घर, ९१ वटा गोठ, ४३ वटा पुल, दुई वटा विद्यालय र दुई वटा सरकारी कार्यालयमा क्षति पुगेको प्रहरीले जनाएको छ । बाढीपहिरामा परी आजसम्म ७१५ वटा पशुचौपायाको मृत्यु भएको छ । उक्त अवधिमा विपद्का घटनाबाट चार हजार ११२ घर परिवार विस्थापित भएका प्रवक्ता कार्कीले जानकारी दिए । रासस