काठमाडौं । ग्लोबल प्रिमियम विद्युतीय गाडी (ईभी) ब्रान्ड जिकर नेपाल भित्रिने भएको छ । पायोनियर मोटोकर्पले यो ईभीलाई नेपाली बजारमा भित्र्याउने भएको हो ।

कम्पनीले जिकर एक्स मोडलका डुअल–मोटर अल–ह्विल ड्राइभ (एडब्ल्यूडी) र सिंगल–मोटर रियर–ह्विल ड्राइभ (आरडब्ल्यूडी) गरी दुई भेरियन्ट सार्वजनिक गर्ने अन्तिम तयारीमा पुगेको बताएको छ ।

पृथक डिजाइन–शैली, अत्याधुनिक प्रविधि, उत्कृष्ट रेन्ज र पर्फमेन्ससहितको जिकर एक्स प्रिमियम कम्प्याक्ट (एसयूभी) भएको कम्पनीले जनाएको छ ।

सबै ड्राइभिङ मोडमा सबै किसिमका सडकमा उत्कृष्ट अनुभव र निर्धक्कता प्रदान गर्ने यो एसयूभी उत्कृष्ट हुने कम्पनीको दाबी छ ।

के छन् अन्य फिचर
जिकर एक्सको दुवै भेरियन्टमा ६६ किलोवाट आवरको ब्याट्री छ । यसले सिंगल मोटर, रियर–ह्विल–ड्राइभ, लङ रेन्ज मोडलमा ४४० किलोमिटर रेन्ज दिने कम्पनीले जनाएको छ । 

२२ किलोवाटको एसी चार्जरसबाट गाडीलाई शून्यबाट १०० प्रतिशतसम्म चार्ज चार घण्टामा गर्नसकिने कम्पनीले जनाएको छ । यससँग १५० किलोवाटको डीसी चार्जर पनि उपलब्ध छ ।

पायोनियर मोटोकर्पका निर्देशक सन्दीपकुमार शारडाले अहिलेको युगमा ग्राहकको जीवनशैलीलाई बुझ्दै आधुनिक प्रविधिमा ग्राहककेन्द्रित गाडी नेपाल भित्र्याउन लागेको बताएका छन् ।

“उच्चस्तरीय पर्फमेन्स, अत्याधुनिक प्रविधिसहित प्रिमियम एसयूभीको बढ्दो मागलाई पूरा गर्दै नेपाली एसयूभी बजारमा जिकर एक्स एक नौलो अनुभव र नयाँ अध्याय सावित हुनेछ भन्नेमा हामी विश्वस्त छौँ,” उनले भने ।

जिकर एक्सको एक्सटेरियरमा ‘स्मुथ लाइन तथा स्कल्पटेड प्रोफाइल’को डिजाइन छ । ‘प्यानोरामिक सनरुफ’ र इन्ट्रिगेटेड डबल–एज्ड एलइडी डीआरएल छ । यसका साथै जिकरको ‘इन्टेलिजेन्ट बी–पिलर’ नामक विशेष सुविधाले कारभित्र प्रवेश गर्नुअगावै गाडीबारे महत्त्वपूर्ण जानकारीहरू ‘डोर ह्यान्डल’मा देखाउँछ ।

गाडीमा ‘यामाहा अडियो सिस्टम’, ‘भेन्टिलेटेड फ्रन्ट सिट’, १४.६ इन्चको टचस्क्रिन डिस्प्ले, ८.८ इन्चको इन्स्ट्रुमेन्ट प्यानल पनि छ ।

सस्टेनेबल एक्सपेरियन्स आर्किटेक्चरमा निर्मित जिकरले स्ट्रक्चरल सेफ्टी र ‘एडभान्स्ड ड्राइभर असिस्टेन्स सिस्टम’सहितको गाडीमा सात वटा एयरब्याग, इन्टर्नल एन्टि–कोलिजन बिम र परिष्कृत सुरक्षा प्रणालीले गाडीमा सवार सबैलाई उच्चस्तरीय सुरक्षा प्रदान गर्ने कम्पनीले जनाएको छ ।