काठमाडौं । जनता समाजवादी पार्टी, नेपालका अध्यक्ष उपेन्द्र यादवले नेपालका कम्युनिस्ट पार्टी सत्ताका निम्ति कल्पना नै गर्न नसकिने गरी गिर्ने गरेको टिप्पणी गरेका छन् । नेपालका कम्युनिस्ट नेताले सत्ता, भत्ता, पैसा र पदलाई साम्यवाद ठान्ने गरेका उनको जिकिर थियो ।

शनिबार काठमाडौंमा पुष्पलाल स्मृति प्रतिष्ठानले आयोजना गरेको एक कार्यक्रममा उनले सत्ताका निम्ति कम्युनिस्टले राजावादीसँग पनि सहकार्य गर्ने गरेको बताए । आफ्नो दर्शन र चिन्तन हराएपछि नेपालका कम्युनिस्ट पार्टीमा अवसरवाद मात्र बाँकी रहेको उनको भनाइ थियो ।

अध्यक्ष यादवले सही बाटोमा रहेका केही कम्युनिस्ट पार्टीहरूले भने मुलुकमा दुःख पाउनुपरेको टिप्पणी गरे ।

उक्त कार्यक्रममा नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’, नेकपा (एकीकृत समाजवादी)का अध्यक्ष माधवकुमार नेपाल, लगायत नेता सहभागी थिए ।

कार्यक्रममा उपेन्द्र यादवको भनाइ पढ्नोस्–
अहिलेको कम्युनिस्ट साथीहरू नरिसाउनु होला, अहिलेका कम्युनिस्ट पार्टीका नेताहरूको हेर्छु म सत्ता, भत्ता, पैसा, पद नै साम्यवाद हो भन्ने ठान्नुभएको छ । र, त्यसको दौडमा यतिसम्म गिर्दछन् कि कल्पना नै गर्न सकिँदैन । त्यो युग अहिले आएको छ । कुनै पनि काम बाँकी नछोड्ने, राजावादीसँग पनि एकता गर्ने, गरेकै हो । केका लागि ? सरकारका लागि । त्यो पनि दुई दिनको सरकारका लागि । राजवादी पनि चलेकै छ, कांग्रेस पनि चलेकै छ । अर्को पनि चलेकै छ । जोसँग पनि चलेकै छ । केको लागि भन्दाखेरि त्यहाँ वैचारिक अन्योलता, आदर्श र चिन्तन हराएपछि केवल अवसरवाद मात्रै बाँकी रहँदो रहेछ । र त्योचाहिँ सबैमा होइन । त्यसले चरम अवस्थामा रहेका, छरिएर रहेका नेपालका कम्युनिस्टहरूमा को सही हो, को गलत हो छुट्टयाउनै गाह्रो छ । तर, जो सही बाटोमा हुनुहुन्छ, उहाँहरूले दुःख पाइराख्नुभएको छ । ती सुविधा, अवसरबाट वञ्चित भएर दुःख पाइराख्नुभएको छ । अब त्यो अवस्था देखिएको छ । न्युज एजेन्सी नेपाल