काठमाडौं । वाग्मती प्रदेशको मुख्यमन्त्रीमा नेपाली कांग्रेस संसदीय दलका नेता बहादुरसिंह लामा (तामाङ)ले दाबी पेस गरेका छन् । प्रदेश संरचना बनेदेखि वाग्मतीमा नेपाली कांग्रेसले सरकारको नेतृत्व पाएको थिएन । 

नेकपा एमालेसमेतको समर्थनमा कांग्रेसका तर्फबाट पहिलोपटक लामा मुख्यमन्त्री बन्न लागेका हुन् । यसअघिका मुख्यमन्त्री शालिकराम जम्कट्टेलले यही साउन ६ गते पदबाट राजीनामा दिएपछि प्रदेश प्रमुख यादवचन्द्र शर्माले संविधानको धारा १६८ (२) अनुसार नयाँ सरकार गठनका लागि आह्वान गरेका थिए । 

प्रदेश प्रमुख शर्माले सरकार गठनका लागि दिएको समयसीमा मंगलबार साँझ ५ बजेसम्मका लागि थियो । तोकिएको समयभित्रै उनको दाबी परेको हो । कांग्रेस–एमालेबीच मन्त्रालय बाँडफाँटमा केही समस्या परेका थियो । तर, नयाँ सरकारमा कांग्रेसले मुख्यमन्त्रीसहित ६ र एमालेले ६ वटा मन्त्रालय पाउने सहमति भएपछि मुख्यमन्त्रीमा दाबी पेस भएको हो । 

११० सदस्य रहेको प्रदेशसभामा बहुमतका लागि ५६ सिट आवश्यक हुन्छ । प्रदेशमा कांग्रेसका ३७ र एमालेका २७ गरी ६४ जना सांसद छन् ।