काठमाडौं । बाढीपहिरो तथा अन्य कारणबाट मुलुकभरका नौवटा सडकखण्ड पूर्णरूपमा अवरुद्ध भएका छन् । अन्य १५९ सडकखण्ड एकतर्फीरूपमा सञ्चालनमा आएका छन् ।

सडक विभागले जारी गरेको तथ्यांकअनुसार डुम्रे–बेँसीसहर–चामे, तानसेन–रिडी–कोरला, पुष्पलाल (मध्यपहाडी) राजमार्गको बागलुङ र डोटीलगायतका सडकखण्ड पूर्णरूपमा अवरुद्ध भएका छन् ।

विभागकाअनुसार विभिन्न स्थानमा पहिरो पन्छाउने काम भइरहेको छ । विभागले रातिको समयमा बाढी पहिरोजस्ता मनसुनजन्य विपद्का कारण यात्रा नै असुरक्षित हुने भन्दै आवातजावत नगर्न सुझाव दिएको छ । 

जल तथा मौसम विज्ञान विभागअन्तर्गतको मौसम पूर्वानुमान महाशाखाले आगामी २४ घण्टामा कोसी, वाग्मती, गण्डकी, लुम्बिनी र सुदूरपश्चिम प्रदेशका केही स्थानमा तथा बाँकी प्रदेशका थोरै स्थानमा मेघगर्जन/चट्याङसहित हल्कादेखि मध्यम वर्षाको सम्भावना रहेको जानकारी दिएको छ ।