![न्युरोड क्षेत्रको फुटपाथ विस्तार तत्काललाई रोक्ने सहमति](https://12khari.top/uploads/posts/newroad_sunilpradhan_12khariphoto-153-1721201931.jpg)
काठमाडौं । विवाद बढेपछि काठमाडौं महानगरपालिकाको फुटपाथ विस्तार तत्काललाई रोकिएको छ । काठमाडौं–२२ र २३ क्षेत्रका सम्पदाका विषयमा अध्ययन गरिने र त्यसको प्रतिवेदन नआउन्जेल फुटपाथ विस्तार नगर्ने सहमति भएको हो ।
न्युरोड क्षेत्रमा थप फुटपाथ विस्तार गर्ने विषयमा अध्ययन गर्न कार्यदल गठन गर्ने सोमबार सहमति गरिएको छ । महानगरका प्रमुख, उपप्रमुख, २२, २३ र २४ नम्बरका वडाअध्यक्षलगायत सरोकारवालाबीच छलफलका क्रममा आउँदो मंसिर १ गतेसम्म कार्यदलले अध्ययन गर्ने र २ गते प्रतिवेदन पेस गर्ने सहमति भएको काठमाडौं–२३ का वडाअध्यक्ष मचाराजा महर्जनले जानकारी दिए ।
नौ सदस्यीय कार्यदलले विभिन्न विषयमा अध्ययन गरेर त्यसबाट आउने रिपोर्ट महानगर प्रमुखलाई बुझाउने र त्यसपछि फुटपाथ विस्तारबारे थप निर्णय गरिने उनले बताए । काठमाडौं–२४ मा जारी फुटपाथ विस्तारको काम भने सम्पन्न गर्ने सहमति भएको उनले जानकारी दिए ।
फुटपाथ विस्तार गर्ने क्रममा यसअघि महानगर र स्थानीयबीच विवाद भएको थियो । विवादपछि महानगरले जनप्रतिनिधिसहित स्थानीयलाई सोमबार छलफलमा बोलाएको थियो ।