काठमाडौं । वन तथा वातावरणमन्त्री ऐनबहादुर शाही ठकुरीले नेपाली कांग्रेस र नेकपा (एमाले)बीचको गठबन्धन सरकार ‘पूरा अवधि’ कायम रहने बताएका छन् । शनिबार काठमाडौंमा आयोजित एक साक्षात्कार कार्यक्रममा उनले शीर्ष नेताले सुझबुझका साथ गठबन्धन बनाएको उल्लेख गरे ।

उनले ०८४ को निर्वाचनसम्म यही गठबन्धन सरकार अगाडि बढ्ने जिकिर गरे । सरकार फेरबदलबाट जनता हैरान भइसकेको भन्दै उनले कांग्रेस–एमाले गठबन्धन अन्तिम विकल्प रहेको बताए । कांग्रेस–एमाले नेतृत्वको सरकार तानाशाही बन्छ भन्नेमा सत्यता नरहेको उनको भनाइ थियो ।

सरकारले लोकतन्त्र सुदृढ बनाउने, गणतन्त्र संस्थागत गर्ने र यसमा भएका कमीकमजोरी सुधार गरेर अगाडि बढ्ने उनले सुनाए । वर्तमान सरकार विशिष्ट परिस्थितिमा निर्माण गरिएको भन्दै उनले सुशासन, राजनीतिक स्थायित्व र विकास दिएर देशलाई अग्रगतिमा लैजाने बताए ।

उनले प्रधानमन्त्री केपी शर्मा ओलीले प्रतिनिधिसभामा दुईतिहाइको हाराहारीमा विश्वासको मत पाउने जिकिर गरे । विश्वासको मत प्राप्त गरेसँगै देशलाई अगाडि बढाउने गरी बृहत् कार्यक्रम ल्याइने उनले बताए । हिमालयन टेली भ्वाइस