काठमाडौं । नेपाल स्टक एक्सचेन्ज (नेप्से)ले सेक्युर्ड सेक्युरिटिजलाई आफ्नै ट्रेड मेनेजमेन्ट सिस्टम (टीएमएस) चलाउन स्वीकृति दिएको छ । ब्रोकरहरूले आफ्नै टीएमएसमार्फत ग्राहकलाई सेवा दिने माग पहिलेदेखि नै गरेका भए पनि सेक्युर्ड सेक्युरिटिजले मात्र स्वीकृति पाएको हो ।

यसरी आफ्नै टीएमएसमार्फत सेवा दिने भनेर ३३ वटा ब्रोकरले नेप्सेसँग लबिङ गर्दै आएको सेक्युर्ड सेक्युरिटिजका अध्यक्ष सन्तोष मैनालीले बताए । सुरूमा सेक्युर्डले स्वीकृति पाएको उनको भनाइ छ ।  

अनलाइनमार्फत सेयर कारोबार गर्न सुरू भएदेखि नै ब्रोकरहरूले आफ्नै टीएमएस सञ्चालनमा ल्याउने र ग्राहकलाई आफूले भने जस्ता फिचरको सुविधा दिन भन्दै आएका थिए । तर, अहिलेसम्म आफ्नै टीएमएस चलाउने अनुमति पाएका थिएनन् । 

सेक्युर्ड सेक्युरिटिजले भने चालु आर्थिक वर्ष २०८१/०८२ देखि आफ्नै टीएमएसमार्फत सेवा दिन भन्दै पूर्वाधार तयार पारेर नेप्सेबाट अनुमति पाएको छ । नेप्सेले पनि प्रारम्भिक अध्ययन गरेर अवस्था हेरी आफ्नै टिएमएसमार्फत सेवा दिन स्वीकृति दिएको नेप्सेका प्रवक्ता मुराहरि पराजुलीले बताए । 

“ब्रोकरले आफ्नै टीएमएसमार्फत सेवा दिन पाउने कानुनी व्यवस्था पनि छ । अहिले हाम्रो टीएमएस चलाइरहेका छन्, तर, अब ब्रोकर ३६ ले भने आफ्नै टीएमएसमार्फत सेवा दिन पाउने भएको छ,” उनले भने, “ब्रोकर नं. ३६ ले प्रक्रिया पुर्‍याएर स्वीकृति पाएको छ ।”

साउन पहिलो हप्तादेखि नै काम सुरु गर्ने गरी अहिले प्राविधिक विषयहरू मिलाइरहेको अध्यक्ष मैनालीले बताए । अहिले नेप्सेलाई मासिक २५ हजार रुपैयाँ टीएमएसको सेवा शुल्क सेक्युर्डले तिरिरहेको उनको भनाइ छ । 

ब्रोकरले सञ्चालनमा ल्याउने टीएमएसको सेवा डीजी हबले दिने पनि उनको भनाइ छ । डीजी हबलाई ब्रोकरले मासिक ७० हजार रुपैयाँ बुझाउनु पर्ने पनि उनको भनाइ छ । “यो सामूहिक रूपमा खरिद गर्ने सफ्टवयर हो । हामी ३३ वटा ब्रोकर मिलेर सञ्चालन गर्ने भनेर पहिलेदेखि नै लागेका थियौँ,” उनले भने, “त्यसको नेतृत्व मैले आफैँ गरेको थिएँ । अरू ब्रोकर कम्पनीका साथीहरूले आवश्यक पूर्वाधार तयार गरिरहनु भएको छ । मैले पहिलो आफ्नै टीएमएस प्रयोग गर्न पाउने स्वीकृति पाएको छु ।”

ब्रोकरले आफ्नै टीएमएस सञ्चालन गरे पनि त्यसको नियमन र अनुगमन नेप्सेले गर्ने छ । नयाँ टीएमएसमार्फत ब्रोकरहरूले ग्राहकका लागि नयाँ फिचर, प्राविधिक विश्लेषण र मोबाइल एप जस्ता सेवा दिने अध्यक्ष मैनालीले बताए ।