काठमाडौं । स्पेनिस टेनिस स्टार कार्लोस अल्कारेजले विम्बल्डनमा आफूले जित निकालेजस्तै स्पेनले पनि युरो–२०२४ को सेमिफाइनलमा जित निकाल्ने विश्वास व्यक्त गरेका छन् ।

विश्व वरीयताको तेस्रो स्थानका तथा साविक विजेतासमेत रहेका अल्कारेजले आइतबार विम्बल्डनको चौथो चरणमा उगो हमबर्टविरुद्ध चार सेटमा जित निकाल्दै क्वार्टरफाइनल यात्रा तय गरेका थिए । अल्कारेजले १६ स्थानका हमबर्टविरुद्ध ६–३ ६–४ १–६ ७–५ को सेटमा जित निकालेका थिए ।

युरो–२०२४ मा स्पेनको प्रदर्शन नियालिरहेका फुटबल समर्थक अल्कारेज युरोपियन च्याम्पियनसिपको सेमिफाइनलकै दिन विम्बल्डनको क्वार्टरफाइनलमा प्रतिस्पर्धा गर्नेछन् ।

“उनीहरूले आज मेरोजस्तै नतिजा निकाल्नेछन् भन्ने आशा छ । मैले टेनिसको क्षेत्रमा जित निकाले, आशा छ स्पेनिस टिमले फुटबलमा जित निकाल्ने छ,” २१ वर्षीय युवा स्टार अल्कारेजले भने ।

तीनपटकका ग्रान्डस्लाम च्याम्पियन अल्कारेज विम्बल्डन आयोजकले आफ्नो खेल तालिकामा लचकता देखाउने आस पोखे ।
“पहिलो कुरा मैले स्पेनलाई समर्थन गरिरहेको छु किनभने त्यो स्पेन हो । टिमका केही खेलाडीसँग राम्रो सम्बन्ध छ, विशेषगरी अल्भारो मोराटासँग । आशा छ मंगलबार हामी एकै समयमा प्रतिस्पर्धा गर्नेछैनौँ । मैले स्पेनको खेल हेर्न पाउँछु भन्ने आश छ ।”