काठमाडौं । सहकारीको बचत अपचलन छानबिन गर्न बनेको विशेष संसदीय छानबिन समितिले ५५ हजार ४१० पीडितले उजुरी दर्ता गरेको जानकारी दिएको छ । जसमा पीडितहरूले ११ अर्ब ६६ करोड ४७ लाख माग दाबी गरेका छन् । 

शुक्रबार समितिले सहकारीको बचत अपचलनबारे गृहसचिव एकनारायण अर्याल, प्रहरी महानिरीक्षक वसन्तबहादुर कुवँर, सीआईबी प्रमुख श्याम ज्ञवाली, अपराध अनुसन्धान विभाग प्रमुख टेकबहादुर तामाङसहितसँग छलफल गरेको थियो ।

छलफलपछि सञ्चारकर्मीहरूलाई जानकारी दिँदै समितिका संयोजक सूर्य थापाले सहकारीसँग सम्बन्धित रहेर पाँच हजार ३०० उजुरी दर्ता भएको जानकारी आफूले पाएको बताए । यीमध्ये ९८ उजुरीमा प्रशासनले मुद्दा अघि बढाएको जानकारी पनि आफूहरूले पाएको उनको भनाइ छ ।

उनका अनुसार अपराध अनुसन्धान विभाग र सीआईबी दुवैले आफ्नो कामअन्तर्गत अनुसन्धान गरेको बताएका छन् ।

आजको बैठकमा कार्यादेशमा अधिकारप्राप्त २९ वटा सहकारी केन्द्रित प्रश्नहरू गरेको उनले बताए । 

“छानबिन भएको, पक्राउ परेर जेल चलान भएको, पुर्पक्षका लागि थुनामा रहेको विदेशमा सहित फरार रहेको जस्ता केसहरूको समग्र स्थितिको जानकारी गराउन हामीले आज उहाँहरूलाई बोलाएको हो,” उनले भने । 

संयोजक थापाले उजुरीहरूको विश्लेषण गर्दा सबैभन्दा बढी काठमाडौंमा ४० सहकारीबाट पाँच हजार ६४८ जना ठगिएको जानकारी आफूहरूले पाएको बताए । ठगीमा संलग्न प्रतिवादीहरूमध्ये २९४ जना पक्राउ परेको तथा ८५६ जना फरार रहेको गृह प्रशासनले छलफलमा जानकारी गराएको बताए ।