काठमाडौं । साविक विजेता इटालीलाई २–० ले स्तब्ध बनाउँदै स्वीट्जरल्यान्ड युरो–२०२४ को क्वार्टरफाइनलमा प्रवेश गरेको छ । शनिबार राति जर्मनीको ओलम्पियास स्टाडियोनमा भएको खेलमा ६८ हजार १७२ जना समर्थकमाझ स्वीट्जरल्यान्डलाई जित दिलाउन रेमो फ्रेउलर र रुवेन भर्गसले गोल गरे ।

खेलको ३७औँ मिनेटमा फ्रेउलरले गोल गरेपछि स्वीट्जरल्यान्डले पहिलो हाफमा १–० को अग्रता बनाएको थियो । यस्तै, ४६औँ मिनेटमा भर्गसले गोल गर्दै स्वीस टिमको अग्रता दोब्बर बनाएका थिए । यसपछि थप गोल नहुँदा स्वीट्जरल्यान्डले साविक विजेतालाई निराश बनाउँदै अन्तिम–८ को यात्रा तय गरेको हो ।

प्रतियोगितामा स्वीट्जरल्यान्ड समूह ‘ए’ को उपविजेता र इटाली समूह ‘बी’ को उपविजेताको रुपमा प्रि–क्वार्टरफाइनल आएका थिए ।

स्वीट्जरल्यान्डले अब सेमिफाइनल प्रवेशका लागि इंग्ल्यान्ड र स्लोभाकियाबीचको विजेतासँग खेल्नेछ ।