काठमाडौं । युरो–२०२४ मा रोमाञ्चक बनेको समूह ‘इ’ बाट युक्रेन बाहिरिएको छ । बुधबार राति भएको समूह चरणको अन्तिम खेलमा बेल्जियमसँग गोलरहित बराबरीमा रोकिएपछि युक्रेन तालिकाको पुछारमा रहँदै प्रतियोगिताबाट बाहिरिएको हो । 

यो समूहका चारवटै टिमले समान चार अंक जोडेका थिए । तर, युक्रेन गोल आधारमा अभागी बनेको हो । यो समूहबाट रोमानिया, बेल्जियम र स्लोभाकिया अन्तिम–१६ मा प्रवेश गरेका छन् । 

बुधबार राति नै भएको खेलमा स्लोभाकियासँग १–१ को बराबरीमा रोकिए पनि रोमानिया तालिकाको शीर्ष स्थानमा रह्यो । रोमानियाले चार अंक जोडे पनि हेड टू हेडमा बेल्जियमलाई पछि पारेको हो । समान खेलबाट चार अंक नै जोडेको बेल्जियम पनि प्रतियोगिताको नकआउट चरणमा प्रवेश गरेको छ । 

यस्तै, तेस्रो स्थानमा रहँदै नकआउटमा स्थान बनाएको स्लोभाकियाले पनि चार अंक नै जोडेको छ । स्लोभाकियाको गोलआधार बराबर छ । यस्तै, पुछारको युक्रेनको खातामा पनि चार अंक नै छ । तर, गोलआधार दुई गोल नकारात्मक हुँदा युक्रेन पहिलो चरणबाटै बाहिरिएको हो ।