काठमाडौं । नेपाली कांग्रेसका उपसभापति धनराज गुरुङले राम्रो पारिश्रमिकको प्रलोभन देखाएर विदेश पठाउने र अलपत्र पार्ने म्यानपावर कम्पनीलाई कारबाही गर्न सरकारसँग आग्रह गरेका छन् । सोमबार प्रतिनिधिसभा बैठकको आकस्मिक समयमा उनले यस्तो माग गरेका हुन् ।

उनले कुवेतको नेपाली जनसम्पर्क समितिको कार्यक्रममा सहभागी भएर आफू स्वदेश फर्कने क्रममा पाँच नेपालीलाई बेलग्रेडबाट फर्काइएको अवस्थामा पाएको उल्लेख गरे । प्रतिव्यक्ति साढे ६ लाख रुपैयाँ लिएर उनीहरूलाई बेलग्रेड पुर्‍याइएको र विमानस्थलमा अलपत्र परी फर्किएको तथा १० नेपाली अझै अलपत्र रहेका उनले सुनाए ।

ती १५ मध्ये १४ जना झापाका र एक बर्दियाका रहेका जानकारी आफूले पाएको उनले बताए । ठगिएका युवालाई क्षतिपूर्ति दिन र म्यानपावर कम्पनीलाई कारबाही गर्न उनले आग्रह गरे । उनले अलपत्र युवालाई सरकारले विशेष पहल गरी स्वदेश फर्काउन पनि आग्रह गरे ।

कुवेतमा अझै ४१ हजार नेपाली महिला कामदार रहेका र तीमध्ये २७ हजार गैरकानुनी बाटो भएर गएका भन्दै उनले यसबारे पनि सरकार गम्भीर बन्नुपर्ने बताए ।

संसद्को आकस्मिक समयमा धनराज गुरुङको भनाइ पढ्नोस्–
कुवेतको नेपाली जनसम्पर्क समिति कार्यक्रममा सहभागी भए हिजो मात्रै म फर्किने क्रममा दोहा ट्रान्जिट भएर आउँदै गर्दा दोहाबाट कतार एयरवेजको जहाज चढ्दै गर्दा त्यहाँ पाँचजना नेपाली युवाहरू बेलग्रेडबाट फर्काइएको जहाजहरू त्यसमा लिएर आएको सन्दर्भमा खबर मैले त्यहाँ सूचना पाएँ । ती युवाहरूलाई मैले त्यही जहाजमा भेटेँ । भेटेर के कारण यस्तो भयो भनेर सोध्दा उहाँहरूलाई झापाको खगोल भन्ने म्यानपावरमार्फत काठमाडौंको डायनामिक भन्ने मुख्य म्यानपावरबाट प्रतिव्यक्ति साढे ६ लाख रुपैयाँ लिएर बेलग्रेड पुर्‍याइएको रहेछ । त्यहाँ रिसिभ नभएपछि विमानस्थलबाटै पाँचजनालाई फर्काइसकिएको अवस्था छ । बाँकी १० जना बेलग्रेट एयरपोर्टमा बिचल्ली भएको अवस्था रहेछ । १५ जनामध्ये १४ जना झापा जिल्लाको मात्रै र एकजना बर्दिया जिल्लाको रहेछ । यसरी म्यानपावरले जथाभावी रूपमा कन्फर्म नभईकन युवालाई साढे ६ लाख रुपैयाँसम्म लिएर यसरी विदेश पठाउने र फर्काउने, यसले मुलुकको शिर झुकाउने काम गरेको छ । युवाहरू ठगिने काम भएको छ । ठूलो रहर बोकेर गएकाहरूलाई फर्काइएको छ । उनीहरूलाई क्षतिपूर्ति दिनुपर्छ । युवाहरूलाई अनियमित ढंगबाट र उनीहरूलाई त्यहाँ सरोकारवालासँग कुरा नभईकन विदेशको लोभ देखाएर पठाई युवाहरू ठग्ने काम क्षम्य छैन । सरकारको ध्यानाकर्षण गराउँछु । कुवेतमा अझै पनि ४१ हजार नेपाली महिला दिदिबहिनीहरू त्यहाँ हुनुहुन्छ । त्यसमध्ये २७ हजार महिलाहरू गैरकानुनी रूपमा रहेको सूचना पाएको छु । गत ६ महिनाभित्र १० हजार नेपाली महिलाहरू गैरकानुनी बाटोबाट त्यहाँ गएका छन् । यो दुःखलाग्दो कुरा हो । सरकारले ढोका बन्द गरेर झ्याल खुला गर्दा यो समस्या आएको हो । न्युज एजेन्सी नेपाल