जेनेभा । युक्रेनका राष्ट्रपति भ्लोदिमिर जेलेन्स्कीले रुसले युक्रेनका सबै भूभाग छोडे भोलि नै शान्ति वार्ता गर्न आफूहरू तयार रहेको जनाएका छन् । युक्रेन र रुसको लडाइँका सम्बन्धमा शान्ति प्रक्रियाका निम्ति छलफल गर्न स्वीट्जरल्यान्डमा आयोजित शिखर सम्मेलनको समापनका क्रममा उनले यस्तो बताएका हुन् ।

तर, भ्लादिमिर पुटिनले युद्ध अन्त्य नगर्ने भएकाले आफूहरूले सैनिक वा कूटनीतिक कुनै पनि माध्यमबाट लडाइँ रोक्नुपर्ने उनले उल्लेख गरे । उनले पश्चिमी सहयोग युद्ध जित्न पर्याप्त नभएको बताए ।

पछिल्लो शिखर सम्मेलनले युक्रेनका पक्षमा अन्तर्राष्ट्रिय समर्थन कमजोर नभएको देखाएको उनले टिप्पणी गरे । युक्रेनको सार्वभौमिक अखण्डतामा ऐक्यबद्धता जनाउँदै सम्मेलन सम्पन्न भएको छ ।

रुसले लादेको युद्धका कारण व्यापक पीडा र विध्वंस निम्तिएको भन्दै एक लिखतलाई शिखर सम्मेलनले अनुमोदन गरेको छ । उक्त लिखतमा भारत, दक्षिण अफ्रिका र साउदी अरेबियाका अधिकारीले भने हस्ताक्षर गरेनन् ।

दुईदिने शिखर सम्मेलनमा करिब ९० मुलुक र अन्तर्राष्ट्रिय संगठनका प्रतिनिधि उपस्थित थिए । बीबीसीबाट ।