गाजा । प्यालेस्टाइनी लडाकु समूह हमासका प्रवक्ताले कति बन्धक अझै जीवित छन् भन्ने बारेमा कसैलाई जानकारी नभएको जनाएका छन् ।

गएको अक्टोबर ७ मा हमासले इजरायलमाथि आक्रमण गरेको थियो । त्यसक्रममा बन्धक बनाइएका मध्ये १२० जना अझै उसका साथमा रहेको बताइँदै आएको थियो । हमासका प्रवक्ताले भने सीएनएनसँगको कुराकानीमा यस्तो अनौठो जवाफ दिएका हुन् ।

हमासका प्रवक्ता तथा राजनीतिक ब्युरोका सदस्य ओसामा हम्दानले भने, “कति जीवित छन् भन्ने बारेमा कसैलाई आइडिया छैन । उनीहरूलाई रिहा गर्न स्थायी युद्धविराम र इजरायली सेना गाजाबाट पूर्ण रूपमा फिर्ता हुनुपर्छ ।”

उनले लेबनानको राजधानी बेरुतमा सीएनएनसँग कुरा गर्दै अमेरिकाका तर्फबाट पछिल्लोपटकको प्रस्ताव गाजामा युद्ध रोक्न आफूहरूलाई पर्याप्त नभएको बताए ।

उनले इजरायलले ६ हप्ताका निम्ति मात्र युद्धविराम गर्न खोजेको उल्लेख गरे । आफूहरूले स्थायी युद्धविराम चाहेको भन्दै उनले अमेरिकाले इजरायललाई यसबारेमा बताउनुपर्नेमा जोड दिए ।