काठमाडौं । भारतमा ५४३ सिटको लागि भएको लोकसभा निर्वाचनमा कुनै पनि दलले एक्लै बहुमत नल्याउने स्पष्ट देखिएको छ । मंगलबार बिहानबाट सुरु भएको मतगणनाको प्रारम्भिक नतिजाअनुसार सत्तारूढ भारतीय जनता पार्टी (भाजपा) बहुमतको नजिक पुगे पनि बहुमत भने ल्याउन सक्ने देखिँदैन । 

बहुमतको लागि २७२ सिट आवश्यक पर्छ । प्रारम्भिक मतगणनाअनुसार भाजपाले २४० सिटको हाराहारीमा जित्ने देखिन्छ । भाजपाले बहुमत ल्याउन नसक्ने भए पनि केही प्रदेशमा भने ‘क्लिन स्वीप’ गर्ने देखिन्छ । हालसम्म भएको मतगणनाको नतिजाले केन्द्र शासित प्रदेश राजधानी दिल्ली समेत ६ वटा प्रदेशमा भाजपाले क्लिन स्वीप गर्ने देखिएको छ । 

भारतीय निर्वाचन आयोगका अनुसार मध्य प्रदेशका २९, अरुणाचल प्रदेशका दुई, त्रिपुराका दुई, हिमाचल प्रदेशका चार, उत्तराखण्डका पाँच र राजधानी दिल्लीका सात वटै सिटमा भाजपाका उमेदवारले अग्रता लिइरहेका छन् । यो अग्रता अन्तिमसम्म कायम राखे भाजपाले दिल्लीसहित ६ वटा प्रदेशमा क्लिन स्वीप गर्नेछ ।