गाजा । इजरायल डिफेन्स फोर्सेज (आईडीएफ)ले हमासद्वारा बन्धक बनाइएका थप चारजनाको मृत्यु भएको जानकारी गराएको छ । त्यससम्बन्धी जानकारी मृतकका परिवारलाई गराइसकेको आईडीएफले जनाएको छ ।

आईडीएफले चाइम पेरी, योराम मेट्जर, अमीराम कूपर र नादाभ पोप्लेवेलको परिवारलाई उक्त जानकारी गराइएको जनाएको छ ।

गएको अक्टोबर ७ मा हमासले इजरायलमाथि आक्रमण गरेपछि अरूसँगै ती चारजनालाई पनि बन्धक बनाइएको थियो । उनीहरूका शव हमासले नै लिएर गएको जनाइएको छ ।

उक्त जानकारी गुप्तचर निकाय, स्वास्थ्य मन्त्रालयको विज्ञ समिति र रिलिजियस सर्भिससम्बन्धी मन्त्रालय र इजरायलका चिफ रबी (यहुदी मामिला हेर्ने निकायका प्रमुख)को माध्यमबाट पुष्टि भएको जनाइएको छ ।

हमासको बन्धक अवस्थामा उनीहरू कसरी मारिए भन्ने बारेमा अनुसन्धान भइरहेको आईडीएफले उल्लेख गरेको छ । सीएनएनबाट ।