काठमाडौं । चलचित्र विकास बोर्ड सोमबार नै बोर्ड बैठकबाट नेपाली चलचित्र उद्योगको नाम ‘सिनेमाण्डु’ राखेर विभागीय मन्त्रालयमा पठाउने तयारीमा थियो । चलचित्रसम्बद्ध आठ संस्थालाई नामकरणबारे बोर्डले छलफलका लागि बोलाएको थियो । उक्त छलफलमा नेपाली चलचित्र उद्योगको नाम ‘सिनेमाण्डु’ राख्ने पक्षमा धेरैले सहमति जनाएका थिए ।

तर, सूचना बाहिर आउनेबित्तिकै बोर्डको उक्त निर्णयको आलोचना भएको थियो । काम गर्नुपर्ने सयौँ विषय हुँदाहुँदै बोर्ड नाममा अल्झिएको भन्दै आलोचना गरिएको थियो । सोमबार नै बोर्ड बैठक बसेर सञ्चार तथा सूचना प्रविधि मन्त्रालयलाई सिफारिस गर्ने बोर्डको तयारी भए पनि आलोचनापछि बोर्ड बैठक बसेन ।

“हिजो बार्ड बैठक बस्ने भनिए पनि बसेन । नामको विषय अहिले विचाराधीन नै छ । बैठकमा ‘सिनेमाण्डु’सँगै ‘कान्तिपुर फिल्मस्’ र ‘एभरेस्ट फिल्मस्’को पनि प्रस्ताव आएको थियो,” चलचित्र विकास बोर्डका सदस्य तथा प्रवक्ता केएल पीडितले बाह्रखरीसँग भने, “सिनेमाण्डुमा सहमति भयो भन्ने कुरा आए पनि सबैको एकमत थिएन । म स्वयं पनि एभरेस्ट फिल्मस् नाम राम्रो हुन्छ कि भन्ने पक्षमा हो । सबैले स्वीकार गर्ने नाम राख्नुपर्छ ।”

चलचित्रका आठ संस्थाभन्दा पनि समग्र नेपालीले स्वीकार गर्न सक्ने र अपनत्व हुने नाम राख्नुपर्ने पक्षमा बोर्ड पुगेको छ । सोमबारकै बैठकमा पनि प्रस्ट सहमति नभएको र बाहिरबाट आलोचना गरिएपछि बोर्ड यो विषयलाई केही समय पछाडि धकेल्ने पक्षमा पुगेको छ । नाम नै नराख्ने कि भन्नेमा पनि बोर्ड पुगेको स्रोतको भनाइ छ ।

‘सिनेमाण्डु’ आफैँमा स्थापित अवार्ड रहेको अवस्थामा अरूको ब्रान्डलाई किन लिने र प्रोमोसन गरिदिने भन्ने विषय पनि उठाइएको बोर्ड स्रोतले बताएको छ । “बाहिर देशमा पनि ब्रान्डिङ गर्न सजिलो हुन्छ भनेर नाम राखेर गइहालौँ भन्ने कुरा बैठकमा आएको थियो । तर, नेपाल चलचित्र उद्योगको होइन, अवार्डको पो ब्रान्डिङ होला जस्तो देखियो,” स्रोतले भन्यो । यही कारण बोर्ड केही समय होल्ड गरेर अरूको पनि विचार बुझ्ने पक्षमा पुगेको हो ।

बोर्ड बैठकको निर्णयपछि नामकरण गरिएको सिफारिस सञ्चार मन्त्रालयमा पठाउने तयारी थियो । मन्त्रालयले मन्त्रिपरिषद् बैठकमा पेस गरेर अनुमोदन गरेपछि नेपाली चलचित्र उद्योगले आधिकारिक नाम पाउँछ भन्ने रणनीतिमा बोर्ड थियो ।

अब यो विषय बोर्डको स्थापना दिवससम्म थन्क्याउने पक्षमा बोर्ड रहेको स्रोतको दाबी छ । स्थापना दिवसमा बोर्डको लोगो र राष्ट्रिय चलचित्र दिवसको मिति सार्वजनिक गरेकै दिन नेपाली चलचित्र उद्योगको नाम घोषणा गर्ने कि भन्ने मनस्थितिमा बोर्ड पुगेको स्रोतले जानकारी दिएको छ ।