काठमाडौं । प्रधानमन्त्री पुष्पकमल दाहाल प्रचण्डले सदन अवरोधबीच नीति तथा कार्यक्रममाथिको जवाफ दिनुपर्दा नमिठो लागेको बताएका छन् । उनले अघिल्लो वर्षको नीति कार्यक्रममाथिको छलफलमा बजेटमा पनि पर्याप्त छलफल गर्ने प्रतिबद्धता व्यक्त गरेको स्मरण गरे । 

“एक वर्षपछि अर्को नीति तथा कार्यक्रमाथि छलफल गर्दैगर्दा सदन अवरोधको स्थितिकाबीचमा मैले सदनमा उठेका प्रश्नको जवाफ दिनुपरेको छ । मलाई बडो नमिठो लागेको छ । दुःखको महसुस भएको छ,” उनले भने । 

प्रधामन्त्री प्रचण्डले सदनको गतिरोध अन्त्यका लागि केही दिनदेखि लगातार राजनीतिक दलका नेतासँग छलफल गरिरहेको बताए । “बेला बेलामा धेरै सहमझदारीको नजिक पुगेको महसुस गरेका छौँ,” उनले भने । 

प्रचण्डले आइतबार बिहान कांग्रेसका सभापति शेरबहादुर देउवासँग छलफल गरेको सुनाए । उनले भोलि बिहानसम्म समझदारी हुने विश्वास व्यक्त गरे । 

“आज र भोलि बिहानसम्म बजेट वक्तव्य पढ्ने बेलामा सहमति र समझदारी बन्नेछ भन्ने विश्वास व्यक्त गर्न चाहन्छु । हामी त्यसको नजिकै छाँै,” उनले भने । उनले संसदीय छानबिन समिति बनाउने कुरामा सबैको सहमति भएको बताए ।