काठमाडौं । सभामुख देवराज घिमिरेले मंगलबार पनि प्रतिपक्ष सांसदको अवरोधबीच प्रतिनिधिसभा बैठक सञ्चालन गरे । प्रमुख प्रतिपक्ष दल नेपाली कांग्रेसका सांसदले वेलमा नाराबाजी र राप्रपा, जसपा नेपाल, लोसपा, राष्ट्रिय जनमोर्चासहितको अवरोधबीच उनले बैठकका काम–कारबाही अघि बढाएका थिए ।

सभामुख घिमिरेले नाराबाजीबीच नैै नीति तथा कार्यक्रम प्रस्तुत गरेकामा राष्ट्रपतिलाई धन्यवाद दिने प्रस्ताव पारित गराए । धन्यवादको प्रस्तावका निम्ति प्रधानमन्त्री र राजनीतिक दलसम्बन्धी विधेयक फिर्ता लिने प्रस्ताव राख्न गृहमन्त्रीलाई सभामुखले ‘रुलिङ’ गरेरै ‘मार्सल’ खटाएका थिए ।

मार्सलको सुरक्षामा प्रधानमन्त्रीले धन्यवाद प्रस्ताव राखेपछि सभामुख घिमिरेले निर्णयार्थ पेस गरेका थिए । उनले निर्णयार्थ पेस गर्ने क्रममा ‘हुन्छ’ भन्ने पक्षमा सत्तापक्षका सांसदहरूले आवाजसहित हात उठाएका थिए ।

त्यसपछि उनले ‘प्रस्तावको विपक्षमा हुने माननीय सदस्यले हुन्न भन्नुस्’ भन्दै प्रस्ताव राखे । नेमकिपाका सांसद प्रेम सुवालले प्रस्तावको विपक्षमा रहेको जनाउ दिँदै ‘हुन्न’ भने । तर, सभामुख घिमिरेले ‘हुन्न भन्ने आवाज सुनिएन’ भन्दै प्रस्ताव पारित भएको घोषणा गरे ।

प्रतिपक्ष आवाज नसुनिएको हुनसक्छ भनेर उनको आसनसँगै रहेका संघीय संसद् सचिवालयका अधिकारीले ‘हुन्न भन्ने एकजना हुनुहुन्छ’ भन्दै सभामुखको ध्यानाकर्षण गराए । त्यसरी ध्यानाकर्षण गराएको अडियो सभामुखकै माइकबाट ‘लिक’ भएर सुनियो । तर, उनले आफ्नो ठहर सच्याएनन् । अर्को कार्यसूची अघि बढाए ।