काठमाडौं । बेलायतका प्रधानमन्त्री ऋषि सुनकले बेलायती सेनामा कार्यरत नेपाली (ब्रिटिस गोर्खा)को प्रशंसा गरेका छन् । सोमबार बेलायती प्रधानमन्त्री कार्यालय टेन डाउनिङ्ग स्ट्रिटमा आयोजित एक विशेष समारोहलाई सम्बोधन गर्ने क्रममा उनले ब्रिटिस गोर्खाको प्रशंसाा गरेका हुन् । 

नेपाल र बेलायतबीच सन् १९२३ मा सम्पन्न मैत्री सन्धि हस्ताक्षर भएको १०० वर्ष पूरा भएको अवसरमा टेन डाउनिङ्ग स्ट्रिटमा विशेष समारोहको आयोजना गरिएको थियो । समारोहलाई सम्बोधन गर्दै बेलायती प्रधानमन्त्री सुनकले नेपाल र बेलायतबीचको ऐतिहासिक सम्बन्धका विभिन्न आयामहरूका बारेमा धारणा राखेका थिए । 

बेलायती राजा चार्ल्सले विगतमा गरेको नेपाल भ्रमणको स्मरण गर्दै उनले विभिन्न क्षेत्रमा ख्यातिप्राप्त बेलायतमा रहेका नेपाली डायस्पोराको काम र उपलब्धिबाट आफू प्रेरित भएको बताएको लन्डनस्थित नेपाली दूतावासद्वारा जारी विज्ञप्तिमा उल्लेख छ । 

आगामी दिनमा बेलायत र नेपालबीच व्यापार, लगानीजस्ता आर्थिक सम्बन्ध तथा जलवायु परिवर्तनका क्षेत्रमा सहकार्य अभिवृद्धि हुने बेलायतका प्रधानमन्त्री सुनकले बताएका थिए । 

समारोहमा बेलायतका लागि नेपाली राजदूत ज्ञानचन्द्र आचार्यले नेपालका प्रधानमन्त्रीका तर्फबाट शुभकामना व्यक्त गरेका थिए । उनले सन् १९२३ मा सम्पन्न मैत्री सन्धिको महत्वको बारेमा जानकारी दिंदै उक्त सन्धिपश्चात् अन्तर्राष्ट्रिय क्षेत्रमा नेपालको उपस्थिति र अन्तर्राष्ट्रिय सम्बन्ध प्रवर्द्धन गर्न महत्वपूर्ण योगदान गरेको उल्लेख गरेका थिए ।

नेपालमा हालसम्म भएका सामाजिक एवं राजनीतिक परिवर्तन तथा हासिल गरेका प्रगतिका बारेमा जानकारी दिँदै उनले बेलायतले नेपालको विकासमा पु¥याएको सहयोगको लागि धन्यवाद दिएका थिए । आगामी १०० वर्षमा नेपाल–बेलायत द्विपक्षीय सम्बन्धलाई थप क्षेत्रहरूमा विस्तार गरी सम्बन्ध अझ सुदृढ हुने विश्वास उनले व्यक्त गरेका थिए ।

बेलायतकी परराष्ट्र राज्यमन्त्री आन मारी ट्रेवल्यानले बेलायत र नेपालबीचको अत्यन्त घनिष्ठ सम्बन्ध रहेको जनाए । उनले बेलायतले नेपालको विकास प्रयासहरूमा गरिरहेको सहयोग जारी राख्ने र आर्थिक सम्बन्धलाई थप विस्तार गरी नेपालको मध्यम आय भएको मुलुक बन्ने लक्ष्यमा सहयोग पुर्‍याउने प्रतिबद्धता जनाएका थिए । 

कार्यक्रममा बेलायतमा विभिन्न पेसा तथा व्यवसायमा रहेका नेपाली समुदाय, भूतपूर्व गोर्खाहरू, बेलायती सांसद तथा उच्चपदस्थ अधिकारीहरू लगायतको उपस्थिति थियो ।