काठमाडौं । आउँदो आर्थिक वर्षको सरकारको नीति तथा कार्यक्रममा नेकपा (एमाले)का अध्यक्ष केपी शर्मा ओली हाबी देखिएका छन् । ओलीले ०७४ सालमा ‘समृद्ध नेपाल, सुखी नेपाली’को नारा अघि सारेका थिए । त्यसअन्तर्गतको पानीजहाजसम्बन्धी कानुन निर्माणको विषय आउँदो आर्थिक वर्षको नीति तथा कार्यक्रममा समावेश गरिएको छ ।

“समुद्रमा सञ्चालन हुने पानीजहाज नेपालमा दर्ता हुने कानुन प्रबन्ध गरिनेछ,” सरकारको नीति तथा कार्यक्रममा भनिएको छ ।

सुनकोसी र नारायणी नदीमा टर्र्मिनलसहितको जलमार्ग बनाउने पनि सरकारको नीति तथा कार्यक्रममा समेटिएको छ ।

ओलीले ०७४ सालको निर्वाचनमा नेपालको पानीजहाज हुने घोषणा गरेका थिए । आफू प्रधानमन्त्री बनेपछि उनले ०७६ पुस १८ गतेलाई पानीजहाजको टिकट काट्ने मिति भनेर घोषणा गरेका थिए । पानीजहाजको कार्यालय स्थापना गर्दै ओलीले नेपालमा पानीजहाज युगको सुरुआत भएको घोषणा समेत गरेका थिए ।

ओलीले ०७४ सालकै निर्वाचनताका तीन वर्षभित्र चीनको केरुङबाट काठमाडौं, पोखरा हुँदै लुम्बिनीसम्म रेल सञ्चालन गर्ने घोषणा गरेका थिए । ओलीको ४० महिने कार्यकालभर सम्भाव्यता अध्ययन समेत नभएको काठमाडौं–केरुङ रेलमार्गको सम्भाव्यता अध्ययन गर्ने विषय योपटकको नीति तथा कार्यक्रममा समावेश गरिएको छ ।