हङकङ । चीनका राष्ट्रपति सी चिनफिङले आफ्नो देश युक्रेनमाथि रुसी आक्रमणको समर्थनमा रहेको भनेर लगाइएको आरोपको खण्डन गरेका छन् । युरोपेली नेताहरूसँगको भेटपछि उनले उक्त खण्डन गरेका हुन् ।

चीनका राष्ट्रपति अहिले ६ दिने युरोप भ्रमणमा छन् । उनले फ्रान्सका राष्ट्रपति इम्मानुएल माक्रोनसँगको संयुक्त पत्रकार सम्मेलनमा ‘चीन संकटको सर्जक नभएको र आफू कसैको पक्षमा नरहेको’ समेत बताए । तर, चीन दर्शक मात्र नभई शान्तिका पक्षमा योगदान गरिरहेको उनको भनाइ थियो । युरोपली आयोगका अध्यक्ष उर्सुला भोन डर लेएनसँग समेत दुईपक्षीय वार्तापछि उनले यस्तो बताएका हुन् ।

उनले युक्रेन संकटका विषयमा अरू (तेस्रो पक्ष)लाई ‘डिफेम’ गर्ने र जिम्मेवार देखाउने कार्य गरी नयाँ शीतयुद्धको बाटो खोज्ने प्रक्रियाको पनि विरुद्धमा रहेको बताए । रुसलाई मेसिन र माइक्रोइलेक्ट्रोनिक टुल्स दिइएको भनेर अमेरिकाले लगाएको आरोपको समेत उनले खण्डन गर्ने प्रयास गरेका थिए । सीएनएनबाट ।