इलाम । इलाम–२ को अन्तिम मत परिणाम सार्वजनिक नहुँदै नेकपा (एमाले)का समर्थकहरू विजय जुलुस निकाल्न मत गणनास्थल बाहिर भेला हुन थालेका छन् ।

इलाम नगरपालिका–८ मा पर्ने गौतम बुद्ध सभा गृहबाहिर एमाले समर्थकहरू भेला भएका छन् । समर्थकहरूको संख्या विस्तारै बढिरहेको छ । उनीहरूले बेलाबेला 'नेकपा (एमाले) – जिन्दावाद'को नारा पनि लगाइरहेका छन् । सबै मत गणनास्थलमा सुरक्षा व्यवस्था कडा पारिएको छ ।

निर्वाचन आयोगका अनुसार अब इलाम नगरपालिकाभित्रका ११ मध्ये ९ वडाको मतगणना गर्न बाँकी छ । आयोगका अनुसार ५२ हजार २७३ मतगणना हुँदा एमालेका सुहाङ नेम्वाङले २१ हजार ३८० मत प्राप्त गरेका छन् । 

उनका निकटतम प्रतिस्पर्धी नेपाली कांग्रेसका डम्बर खड्काले १४ हजार ७५२ मत पाएका छन् । उनीहरूबीचको मतान्तर ६ हजार ६२८ रहेको छ ।