काठमाडौं । पोखरा अन्तर्राष्ट्रिय विमानस्थलबाट चार दिनयता उडान र अवतरण अवरुद्ध भएको छ । प्रतिकूल मौसमका कारण गएको शुक्रबार र शनिबार पोखरा अन्तर्राष्ट्रिय विमानस्थल पूर्ण रूपमा ठप्प भएको थियो । 

त्यहाँ आइतबार दिउँसो १ बजेदेखि उडान/अवतरण भएको थियो । सोमबार बिहानै पोखराबाट बुद्ध एयरका दुई विमान उडे । त्यसपछि अपराह्न १२ बजेसम्म कुनै उडान/अवतरण हुन नसकेको पोखरा विमानस्थल स्रोतले जानकारी दिएको छ ।

विमान उडानका निम्ति एक हजार ६०० र अवतरणका लागि एक हजार भिजिबिलिटी आवश्यक हुन्छ । तर, हाल पोखरामा भिजिबिलिटी २५ सय छ । सोमबार बिहान पोखराको भिजिबिलिटी तीन हजार थियो ।

“पोखराको भिजिबिलिटी बिहान तीन हजार थियो । अहिले दुई हजार ५०० मा झरेको छ । प्रदूषणका कारण पोखराको मौसम खुल्न सकेको छैन । अहिले तुवाँलो र हेज लागेर मौसम खुल्न सकिरहेको छैन । आज मौसम खुल्ने सम्भावन एकदमै न्यून छ,” मौसमविद् हिरा भट्टले बाह्रखरीसित भने ।

चार दिनमा करिब १०० उडान रद्द
काठमाडौं–पोखरा रुटमा शुक्रबारदेखि आइतबारसम्म बुद्ध एयरका ४५ उडान रद्द भएको छ । बुद्धको काठमाडौं–पोखरामा दैनिक १७ उडान तालिका छ । शुक्रबार र शनिबार सबै उडान रद्द भएको थियो । आइतबार ६ उडान भयो । आज पनि अब उडान हुन्छ/हुन्न भन्न सकिने अवस्था नरहेको बुद्ध एयरका प्रवक्ता दीपेन्द्र कर्णले बताए ।

काठमाडौं–पोखरा रुटमा बिहीबारयता यती एयरलाइन्सका पनि ३४ उडान रद्द भएको छ । बिहीबार यतीका ६, शुक्रबार र शनिबार १०/१० र आइतबार आठ उडान रद्द भएको थियो । आज पनि कति उडान रद्द हुन्छ भन्ने यकिन नरहेको प्रवक्ता सुदर्शन बर्तौलाले बताए । काठमाडौं–पोखरा यतीको दैनिक १० उडान तालिका छन् ।

यो रुटमा श्री एयरलाइन्सले दैनिक तीन उडान गर्दै आएको छ । श्रीका पनि शुक्रबार र शनिबार तीन/तीन र आइतबार दुई उडान रद्द भएको थियो ।

जल तथा मौसम विज्ञान विभाग पोखरा शाखाका अनुसार सोमबार पनि मौसम खुल्ने सम्भावना न्यून छ । पोखरा आसपासमा लागेको डढेलो र सडक निर्माणका कारण प्रदूषण भएको भट्टले जानकारी दिए ।

“पोखरा–काठमाडौं सडक निर्माणको काम भइरहेको छ । त्यसबाट निस्केको प्रदूषण, विभिन्न क्षेत्रमा लागेको डढेलोले पोखराको मौसम प्रदूषण देखिएको छ,” उनले भने ।